പയ്യന്നൂര്: തെരഞ്ഞെടുപ്പുമായി ബന്ധപ്പെട്ട് അക്രമ ഭീഷണിയുള്ളതിനാല് പോലീസ് സംരക്ഷണമേര്പ്പെടുത്തിയ കാങ്കോലിലെ വര്ക്ക്ഷോപ്പില് അതിക്രമിച്ചു കയറി അക്രമം നടത്തി, അറ്റകുറ്റപ്പണികള്ക്കായി നല്കിയ കാറുമായി കടന്നു. ഈ സംഭവത്തില് ആലപ്പടമ്പ് സ്വാമിമുക്കിലെ ദിഷ്ണു ദിവാകരന്റെ പരാതിയില് രാമന്തളിയിലെ മെഹറൂഫിനും കൂടെയുണ്ടായിരുന്ന കണ്ടാലറിയാവുന്ന രണ്ടുപേര്ക്കുമെതിരെ പെരിങ്ങോം പോലീസ് കേസെടുത്തു.
ഇന്നലെ വൈകുന്നേരം നാലിനാണ് വി. കുഞ്ഞികൃഷണന് അനുഭാവിയായ സി. ദിവാകരന്റെ ഉടമസ്ഥതയിലുള്ളതും മകന് ദിഷ്ണു ദിവാകരന് നോക്കി നടത്തുന്നതുമായ കാങ്കോലിലെ വര്ക്ക്ഷോപ്പില് പരാതിക്കാസ്പദമായ സംഭവം. രണ്ടുമാസങ്ങള്ക്കുമുമ്പ് അറ്റകുറ്റപ്പണികള്ക്കായി വര്പ്പിലെത്തിച്ച കാര് എടുക്കാത്തതിനെ തുടര്ന്ന് വര്ക്ക് ഷോപ്പില്നിന്ന് കാര് മാറ്റണമെന്ന് വാഹനയുടമയ്ക്കു സന്ദേശമയച്ചിരുന്നു.
ഇതേതുടര്ന്നെത്തിയ ആളുകള് സര്വീസ് ചാര്ജ് നല്കാതെ കാറെടുക്കാന് ശ്രമിക്കുകയായിരുന്നു. ഇത് തടയാന് ശ്രമിച്ച ദിഷ്ണുവിനെ ലോഹായുധം കൊണ്ട് താടിയില് മുറിവേല്പ്പിക്കുകയും നെഞ്ചിലിടിച്ച് പരിക്കേല്പ്പിച്ച് കാറുമായി കടന്നുവെന്നുമാണ് പരാതി.പരിക്കേറ്റ ദിഷ്ണുവിനെ കണ്ണൂര് ഗവ. മെഡിക്കല് കോളജ് ആശുപത്രിയില് പ്രവേശിപ്പിച്ചു.
തെരഞ്ഞെടുപ്പുമായി ബന്ധപ്പെട്ട ഭീഷണിയുണ്ടായിരുന്നതിനാല് ദിവാകരനും സ്ഥാപനത്തിനും പോലീസ് സംരക്ഷണമേര്പ്പെടുത്തിയിരുന്നു. ദിവസങ്ങളായി തുടരുന്ന ഈ സംരക്ഷണത്തിനിടയില് പോലീസ് സ്ഥലത്തില്ലാത്ത സമയത്താണ് ആക്രമണമുണ്ടായത്. പോലീസ് സ്ഥാപിച്ചതുള്പ്പെടെയുള്ള നിരീക്ഷണ കാമറ ദൃശ്യങ്ങളില് വര്ക്ക്ഷോപ്പില് നടന്ന അക്രമ ദൃശ്യങ്ങള് പതിഞ്ഞിട്ടുണ്ട്. ഇതുകൂടി പരിശോധിച്ചാണ് പെരിങ്ങോം പോലീസ് പ്രതികള്ക്കെതിരെ കേസെടുത്തത്.
