കുമരകം: ചെങ്ങളം രണ്ടാം കലുങ്കിന് സമീപമുള്ള 11 കെവി ലൈനിലെ പോസ്റ്റിൽ കയറിയ ചേര പാന്പ് പണി പറ്റിച്ചു. ഇതോടെ കുമരകം വടക്കുംഭാഗത്തേയ്ക്കുള്ള വൈദ്യുതി മണിക്കൂറുകളോളം നിലച്ചു.
രണ്ടാം കലുങ്കിലെ ചീപ്പുങ്കൽ ഫീഡറാണ് പാന്പ് കയറിയതോടെ തകരാറിലായത്. ഇന്നലെ വൈകുന്നേരം 5.30നു ഫീഡർ ഓഫ് ആകുകയും സബ് സ്റ്റേഷനിൽനിന്നു പല തവണ ചാർജ് ചെയ്തെങ്കിലും പ്രവർത്തിച്ചില്ല.
ഈ പോസ്റ്റിനു സമീപം താമസിക്കുന്ന വൈദ്യുതി ബോർഡിലെ ഉദ്യോഗസ്ഥനായ ചന്പക്കുളം പോൾ ലൈനിൽ ഷോർട്ടിംഗിനെ തുടർന്നണ്ടായ ശബ്ദം ശ്രദ്ധിക്കുകയും കുമരകം വൈദ്യുതി ഓഫീസിൽ അറിയിക്കുകയും ചെയ്തു.
ലൈൻ ചാർജു ചെയ്തിട്ടും നിൽക്കാത്തതിന്‍റെ കാരണം അന്വേഷിച്ച സബ് എൻജിനിയറും ഓവർസിയറും ലൈൻമാനും സ്ഥലത്തെത്തി നടത്തിയ പരിശോധനയിലാണ് വില്ലാനായ അഞ്ച് അടി നീളം വരുന്ന ചേരയാണെന്ന് കണ്ടെത്തിയത്.
ഇരുന്പു പോസ്റ്റിലും ലൈനുകളിലുമായി ഷോക്കേറ്റു ജീവനറ്റു കിടന്ന പാന്പിനെ തോട്ടി എത്തിച്ച് നീക്കം ചെയ്ത ശേഷമാണ് വൈദ്യുതി ലൈനിലെ തകരാർ പരിഹരിച്ചത്.
