ചെറിയപ്രായത്തിൽ താൻ വലുതാകുമ്പോൾ അച്ഛനും അമ്മയ്ക്കുമായി എന്തൊക്കെ കാര്യങ്ങൾ ചെയ്ത് തരുമെന്ന് കുട്ടികൾ മാതാപിതാക്കളോട് പറയാറുണ്ട്. തങ്ങളുടെ മക്കൾ അക്കാര്യങ്ങൾ ഒക്കെ ചെയ്ത് തരുമോ എന്നതിലല്ല മറിച്ച് ആ കുഞ്ഞുമനസിൽ അച്ഛനോടും അമ്മയോടുമുള്ള കരുതലിന്‍റെയും സ്നേഹത്തിന്‍റെയും വാക്കുകളാണ് മാതാപിതാക്കൾക്ക് സന്തോഷം നൽകുന്നത്.
എന്നാൽ കുട്ടികൾ അച്ഛനും അമ്മയ്ക്കും നൽകിയ വാഗ്ദാനങ്ങൾ ഓർമയിൽ സൂക്ഷിച്ച് വലുതാകുമ്പോൾ അത് നിറവേറ്റി നൽകിയാലോ? അത്തരത്തിലൊരു വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
ആരതി സാവന്ത് എന്ന ഇന്‍സ്റ്റഗ്രാം ഐഡി ഉടമയാണ് തന്‍റെ അച്ഛന് നല്‍കിയ സര്‍പ്രൈസിന്‍റെ വിഡിയോ പങ്കുവച്ചിരിക്കുന്നത്. ‘അച്ഛന് പണ്ടുമുതലേ ആഗ്രഹിച്ചിരുന്നതാണ് ഒരു റോയല്‍ എന്‍ഫീള്‍ഡ് ബുള്ളറ്റ്, പലവട്ടം അദ്ദേഹം ഇക്കാര്യം പറഞ്ഞിട്ടുണ്ട്.
കുഞ്ഞായിരുന്നപ്പോള്‍ ഞാന്‍ അദ്ദേഹത്തിന് വാക്കുകൊടുത്തിരുന്നതാണ് വലുതായി ഒരു ജോലിയാകുമ്പോള്‍ അച്ഛന് എന്തായാലും ബുള്ളറ്റ് വാങ്ങിത്തരും എന്ന്. എനിക്ക് ജോലി കിട്ടിയപ്പോൾ മുതൽ ഞാൻ ഇതിനുവേണ്ടി പണം സ്വരുക്കൂട്ടി. എന്‍റെ അച്ഛനെപ്പോലെ തന്നെ എനിക്ക് പ്രധാനപ്പെട്ടതായിരുന്നു അദ്ദേഹത്തിന്‍റെ ഈ ആഗ്രഹവും.
ഒരു ബുള്ളറ്റ് സ്വന്തമായി വാങ്ങാനുള്ള തുകയൊന്നും എന്‍റെ കയ്യിലുണ്ടായിരുന്നില്ല. പക്ഷേ ഓരോ തവണയും അച്ഛൻ എനിക്കും എന്‍റെ കുടുംബത്തിനും വേണ്ടി ചെയ്തു തന്നിട്ടുള്ള കാര്യങ്ങൾ ഓർക്കുമ്പോൾ എങ്ങനെയും ബുള്ളറ്റ് വാങ്ങി കൊടുക്കണമെന്ന ആഗ്രഹം എന്നിൽ അതിശക്തമായി ഉടലെടുക്കും.
അച്ഛന് കുടുംബത്തിനായി അദ്ദേഹത്തിന്‍റെ വ്യക്തിപരമായ ഒരുപാട് കാര്യങ്ങള്‍ ത്യജിച്ചിട്ടുണ്ട്. ഞങ്ങള്‍ക്ക് യാതൊരു ബുദ്ധിമുട്ടും ഉണ്ടാകാതിരിക്കാനായിരുന്നു അത്. ഇന്ന് അച്ഛന്‍റെ ജീവിതാഭിലാഷം എനിക്ക് സാധിച്ചു കൊടുക്കാനായി. ഒരുപാട് സ്നേഹവും കടപ്പാടുമുണ്ട് അച്ഛനോട്’ എന്ന കുറിപ്പിനൊപ്പമാണ് യുവതി വീഡിയോ പങ്കുവച്ചിരിക്കുന്നത്.
ഷോറൂമിലേക്ക് അച്ഛന്‍റെയും അമ്മയുടെയും കണ്ണുകൾ തുണികൊണ്ട് കെട്ടിവെച്ചാണ് ആരതി ഇവരെ കൊണ്ടുവരുന്നത്. മക‍ളുടെ സമ്മാനം കണ്ട് ഇരുവരും സന്തോഷിക്കുന്നുണ്ട്. വീഡിയോയിൽ അച്ഛനും അമ്മയും ബുള്ളറ്റിൽ യാത്ര ചെയ്യുന്ന ദൃശ്യങ്ങളുമുണ്ട്.
വീഡിയോ കാണാൻ ഇവിടെ ക്ലിക്ക് ചെയ്യുക
