ഭര്‍തൃവീട്ടില്‍ ജീവനൊടുക്കുന്നതും കൊല്ലപ്പെടുന്നതുമായ പെണ്‍കുട്ടികളുടെ എണ്ണം കേരളത്തലില്‍ അനുദിനം കൂടുകയാണ്.
കോഴിക്കോട് ദുരൂഹസാഹചര്യത്തില്‍ ഭര്‍തൃവീട്ടില്‍ മരിച്ച ഷഹാനയെന്ന 20കാരിയാണ് ഇക്കൂട്ടത്തില്‍ ഏറ്റവും പുതിയ ആള്‍.
ഈ സാഹചര്യത്തില്‍ മലയാളി മാതാപിതാക്കളെ ഒരു കാര്യം ഓര്‍മപ്പെടുത്തുകയാണ് സൈക്കോളജിസ്റ്റ് കൂടിയായ റംസീന്‍.
സ്വന്തം മക്കളെ പൈസയും പണവും കൊടുത്തു ഭാരം ഒഴിവാക്കി വിടുന്ന വീട്ടുകാരോടാണ് റംസീന്‍ ചിലത് പറയുന്നത്…
റംസീന്റെ ഫേസ്ബുക്ക് കുറിപ്പ് വായിക്കാം…എന്തിനാ കുരുതി കൊടുക്കാനായിട്ട് സ്വന്തം മക്കളെ പൈസയും പണവും കൊടുത്തു ഭാരം ഒഴിവാക്കി വിടുന്നത്…
ഏതൊരു പെണ്‍കുട്ടിക്കും ചോദിക്കാന്‍ തന്റെ വീട്ടുകാര്‍ വിളിപ്പാടകലെയുണ്ടെങ്കില്‍ ഒരു ഭര്‍ത്താവും, ഭര്‍തൃ വീട്ടുകാരും അവളെ ഒന്നും ചെയ്യില്ല…
നിനക്ക് അവിടെ ബുദ്ധിമുട്ട് ഉണ്ടെങ്കില്‍ ഇങ്ങു പോന്നേക്കണം എന്ന ധൈര്യം കൊടുത്താല്‍ ഒരു പെണ്ണും ആത്മഹത്യയും ചെയ്യില്ല…
മറിച്ചു ബന്ധുക്കളെയും, കാര്‍ന്നോന്മാരെയും വിളിച്ചു സഭ കൂട്ടി വീണ്ടുമവളെ ഓരോ മുട്ട് ന്യായങ്ങള്‍ പറഞ്ഞു നരകത്തിലേക്ക് തള്ളി വിടുമ്പോള്‍ പിന്നീട് ഉണ്ടാവുന്ന ഓരോ കാര്യങ്ങള്‍ക്കും ഉത്തരവാദി മാതാപിതാക്കള്‍ മാത്രം ആവും…നഷ്ടവും നിങ്ങള്‍ക്ക് മാത്രം ആയിരിക്കും…
ഏത് സമൂഹത്തിനെ /ബന്ധുക്കളെ കൂട്ടിയിരുത്തി എന്തൊക്കെയോ നാണക്കേടിന്റെ പേരില്‍ നിങ്ങള്‍ എടുത്ത തീരുമാനം തീരാ വേദനയായി നിങ്ങള്‍ക്ക് മുകളില്‍ കിടന്നാടുമ്പോള്‍ ഇതേ സമൂഹവും ബന്ധുക്കളും നിങ്ങളെ കുറ്റപ്പെടുത്താന്‍ മുന്‍പന്തിയില്‍ ഉണ്ടാവും എന്നതും വാസ്തവമാണ്…
നിങ്ങളുടെ മക്കള്‍ നിങ്ങളുടെ മാത്രം ഉത്തരവാദിത്തമാണ്.. അവള്‍ക്ക് പേരിട്ടപ്പോള്‍, അവളെ സ്‌കൂളില്‍ ചേര്‍ത്തപ്പോള്‍, അവള്‍ക്കു ഇഷ്ട്ടപ്പെട്ട വസ്ത്രവും, ഭക്ഷണവും, മറ്റെല്ലാതും വാങ്ങിക്കുമ്പോളും ഇതേ ബന്ധുക്കളും സമൂഹവും കൂടിയിരുന്നു ആലോചിച്ചാണോ ചെയ്തിരുന്നത്?? പിന്നെന്തിനാണ് അവള്‍ക്കൊരു ബുദ്ധിമുട്ട് വരുമ്പോ മാത്രം ഇവരെയൊക്കെ ചേര്‍ത്ത് തീരുമാനം എടുക്കാന്‍ കാത്തു നിക്കുന്നത്??
നിങ്ങളുടെ മകള്‍ വിഷമിക്കുന്നെങ്കില്‍ നിങ്ങള്‍ ആ സ്പോട്ടില്‍ പോയി തീരുമാനിക്കണം.. ആ വിഷമത്തിന് പരിഹാരം കണ്ടെത്തണം… അല്ലെങ്കില്‍ പല ഖബറുകളും വീണ്ടും തുറക്കേണ്ടി വരും…
അവള്‍ കരഞ്ഞു കരഞ്ഞു മരിച്ചു കഴിഞ്ഞല്ലാ അവള്‍ക്ക് വേണ്ടി നിങ്ങള്‍ കരയേണ്ടത്.. ജീവനോടെ ഉള്ളപ്പോള്‍ അവളുടെ കണ്ണീരിനു പരിഹാരം കണ്ടു അവള്‍ക്കൊപ്പം നിക്കുന്നവരാവുക…
അവള്‍ക്കു നഷ്ടപ്പെടുന്നത് ചിലപ്പോള്‍ ഒരു ഭര്‍ത്താവ് മാത്രം ആയിരിക്കും.. എന്നാലും അവളെ നിങ്ങള്‍ക്ക് ജീവനോടെ കാണാം…
അതല്ലാ ഭര്‍ത്താവിനെ വിട്ട് പോരുന്നത് അവളുടെ ജീവന്‍ പോവുന്നതിനേക്കാള്‍ നാണക്കേട് ആയി തോന്നുന്നുവെങ്കില്‍ താഴെ കൊടുത്ത ലിസ്റ്റിലെ ഫോട്ടോയില്‍ അടുത്തത് നിങ്ങള്‍ക്ക് മകളെയും കാത്തിരിക്കാം… റംസീന്‍
