തിരുവനന്തപുരം: കേരളത്തിലെ വിവിധ ജില്ലകളിൽ വ്യാപകമായി കഞ്ചാവ് എത്തിച്ച് നൽകുന്ന മൊത്ത വ്യാപാരിയായ തമിഴ്നാട് സ്വദേശിയെ റെയിൽവെ പോലീസ് മധുരയിൽ നിന്നും അറസ്റ്റ് ചെയ്തു.
മധുരയിലെ ആർ.എസ്.പാളയം കോളനിയിൽ താമസിക്കുന്ന ഹരിഹരൻ (42) നെയാണ് തിരുവനന്തപുരത്ത് നിന്നുള്ള റെയിൽവെ പോലീസ് സംഘം സാഹസികമായി അറസ്റ്റ് ചെയ്തത്. പാറശാലയിൽ ട്രെയിൻമാർഗം കഞ്ചാവ് എത്തിച്ച സംഭവത്തിൽ ഒരാളെ പോലീസ് അറസ്റ്റ് ചെയ്ത് നടത്തിയ അന്വേഷണത്തിലാണ് ഹരിഹരൻ പിടിയിലായത്.
ആന്ധ്രപ്രദേശിൽ നിന്നും കന്പത്തുനിന്നുമായാണ് ഇയാൾ കഞ്ചാവ് വാങ്ങി കേരളത്തിലേക്ക് മൊത്തകച്ചവടം നടത്തി വന്നിരുന്നതെന്ന് പോലീസ് പറഞ്ഞു.
റെയിൽവെ സിഐ. കരുണാകരൻ, പാറശാല റെയിൽവെ എസ്ഐ.ഷിബുകുമാർ, സിപിഒ അനിൽകുമാർ എന്നിവരുടെ നേതൃത്വത്തിലുള്ള പോലീസ് സംഘം മധുരയിൽ എത്തിയാണ് പ്രതിയെ അറസ്റ്റ് ചെയ്തത്. പ്രതിയെ പിടികൂടിയപ്പോൾ ഇയാളുടെ ഗുണ്ടാ സംഘം പോലീസിനെ ആക്രമിച്ച് പ്രതിയെ രക്ഷപ്പെടുത്താൻ ശ്രമിച്ചെങ്കിലും പോലീസ് സാഹസികമായി അറസ്റ്റ് ചെയ്ത് തിരുവനന്തപുരത്തെത്തിയ്ക്കുകയായിരുന്നു. പ്രതിയെ വിശദമായി ചോദ്യം ചെയ്ത് വരികയാണ്. ഇന്ന് കോടതിയിൽ ഹാജരാക്കും.