കേരളം മുഴുവൻ വ്യാപിച്ചു കിടക്കുന്ന ചലച്ചിത്ര കൂട്ടായ്മയായ മിത്ര ഫിലിംസ് ആദ്യമായി നിർമിക്കുന്ന ചിത്രമാണ് “ജ്യോതിലക്ഷ്മി തിരക്കിലാണ്’. ചിത്രത്തിന്റെ പൂജയും ടൈറ്റിൽ ലോഞ്ചും കഴിഞ്ഞ ദിവസം എറണാകുളം പാലാരിവട്ടം വൈഎംസിഎ ഹാളിൽ നടന്നു.ചലച്ചിത്ര നടൻ ബിനീഷ് ബാസ്റ്റിൻ ആണ് ഭദ്രദീപം തെളിയിച്ച് ഉദ്ഘാടനം ചെയ്തത്. ടൈറ്റിൽ ലോഞ്ചിംഗ് നടൻ സജിത്ത് തോപ്പിൽ നിർവഹിച്ചു.
മിത്ര ഫിലിംസിന്റെ സെക്രട്ടറി ഭാസ്കരൻ വെറ്റിലപ്പാറ സ്വാഗതം പറഞ്ഞ ചടങ്ങിൽ, ട്രഷറർ ബബിത നന്ദി പറഞ്ഞു. നടി ദേവ നന്ദ സുരേഷ്, രക്ഷാധികാരി സിജി രാജൻ, വൈസ് പ്രസിഡന്റ് മഞ്ജു ജിജി, രഞ്ജിത്ത് കോഴിക്കോട്, ഷറഫു കരൂപ്പടന്ന തുടങ്ങിയവർ ആശംസകൾ നേർന്ന് സംസാരിച്ചു. ചടങ്ങിൽ, മിത്ര ഫിലിംസിന്റെ പ്രസിഡന്റ് റെജി ആനത്താരക്കൽ എഴുതിയ ചിത്രത്തിന്റെ സ്ക്രിപ്റ്റ് സെക്രട്ടറി ഭാസ്കരൻ വെറ്റിലപ്പാറയ്ക്കു കൈമാറി. ചടങ്ങിൽ മിത്ര ഫിലിംസിന്റെ പ്രവർത്തകരും, മറ്റ് സിനിമാ പ്രവർത്തകരും പങ്കെടുത്തു.
മിത്ര ഫിലിംസ് നിർമിക്കുന്ന “ജ്യോതിലക്ഷ്മി തിരക്കിലാണ്’ റഷീദ് ചേളാരി സംവിധാനം ചെയ്യുന്നു. കഥ, തിരക്കഥ, സംഭാഷണം-റെജി ആനത്താരക്കൽ, പ്രൊഡക്ഷൻ കൺട്രോളർ-ഷറഫു കരൂപ്പടന്ന, പിആർഒ-അയ്മനം സാജൻ. പ്രമുഖ താരങ്ങളും പുതുമുഖങ്ങളും വേഷമിടുന്ന സിനിമയുടെ ചിത്രീകരണം ഉടൻ ആരംഭിക്കും.
-അയ്മനം സാജൻ
