കൊച്ചി: മുൻ ചാലക്കുടി എംപിയും എറണാകുളം ഡിസിസി പ്രസിഡന്റും കെപിസിസി രാഷ്ട്രീയ കാര്യസമിതി അംഗവുമായ കെ.പി. ധനപാലൻ (76) അന്തരിച്ചു. നോർത്ത് പറവൂരിലെ സ്വകാര്യ ആശുപത്രിയിലായിരുന്നു അന്ത്യം. സംസ്കാരം ഇന്ന് വൈകിട്ട് 5.30നു പറവൂർ തോന്ന്യകാവ് ശ്മശാനത്തിൽ.
2009ൽ ചാലക്കുടിയിൽ നിന്നാണ് ലോക്സഭാംഗമായി തെരഞ്ഞെടുക്കപ്പെട്ടത്. എറണാകുളം ജില്ലയിലെ കോൺഗ്രസിന്റെ പ്രധാന മുഖമായിരുന്ന കെ.പി. ധനപാലൻ, ആറുവർഷം ജില്ലാ കോൺഗ്രസ് കമ്മിറ്റിയുടെ പ്രസിഡന്റായി പ്രവർത്തിച്ചു.
2014 ൽ തൃശൂരിൽ നിന്ന് ലോക്സഭയിലേക്ക് മത്സരിച്ചെങ്കിലും പരാജയപ്പെട്ടു. മിൽമ ചെയർമാനായും നോർത്ത് മലബാർ ഗ്രാമീൺ ബാങ്ക് ഡയറക്ടർ ബോർഡ് അംഗമായും പ്രവർത്തിച്ചിട്ടുണ്ട്. പറവൂർ കളത്തിൽ കുടുംബാംഗമാണ്. ഭാര്യ: സുമ. മക്കൾ: മിലാഷ്, പരേതനായ ബ്രിജിറ്റ്. മരുമകൾ: ഹൃദ്യ.
