ഫിച്ചുബര്‍ഗ് (വിസ്‌കോന്‍സില്‍): സഹോദരന്റെ വെടിയേറ്റ് പതിനൊന്നു വയസുള്ള സഹോദരി കൊല്ലപ്പെട്ടു.
ബുധനാഴ്ച 15 വയസുള്ള സഹോദരനെ ഫസ്റ്റ് ഡിഗ്രി മര്‍ഡറിനു അറസ്റ്റു ചെയ്തു ഡെയ്ന്‍ കൗണ്ടി ജയിലിലേക്ക് മാറ്റിയതായും പോലീസ് അറിയിച്ചു.
ഒറിഗന്‍ സ്‌കൂള്‍ ഡിസ്ട്രിക്റ്റിലെ ആറാം ക്ലാസ് വിദ്യാര്‍ഥിയാണ് കൊല്ലപ്പെട്ട പെണ്‍കുട്ടി.
ചൊവ്വാഴ്ച രാത്രി പത്തോടെയാണ് സംഭവത്തെക്കുറിച്ച് പോലീസിന് വിവരം ലഭിച്ചത്.
സംഭവസ്ഥലത്തു എത്തിയ പോലീസ്, രക്തത്തില്‍ കുളിച്ചു കിടന്നിരുന്ന പെണ്‍കുട്ടിയെ അടുത്തുള്ള ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല.
ഇരുവരുടേയും മാതാപിതാക്കള്‍ ഇതൊരു അപകടമാണെന്നും മകനെ രക്ഷിക്കാന്‍ നിയമനടപടികള്‍ സ്വീകരിക്കണമെന്നും അറിയിച്ചു.
മാതാപിതാക്കള്‍ക്കൊപ്പം ഇരുവരും വിഡിയോ ഗെയിം കളിക്കാറുണ്ടായിരുന്നുവെന്നു പിതാവ് പറഞ്ഞു.
സംഭവത്തെ കുറിച്ചു കൂടുതല്‍ അന്വേഷണം ആവശ്യമാണെന്നും, പതിനഞ്ചു വയസുകാരന് തോക്ക് എങ്ങനെ ലഭിച്ചുവെന്നും അന്വേഷണ പരിധിയില്‍ വരുമെന്ന് ഫിച്ചുബര്‍ഗ് പൊലീസ് പറഞ്ഞു.
കുട്ടിയുടെ സംസ്‌കാര ചടങ്ങുകള്‍ക്കായി ഗോ ഫണ്ട് മി പേജ് ആരംഭിച്ചിട്ടുണ്ട്. 25000 ഡോളറാണ് പ്രതീക്ഷിക്കുന്നത്.
-പി.പി. ചെറിയാന്‍
