എഴുതാൻ മറ്റൊരു നോട്ട്പാഡ് കിട്ടാത്തതുകൊണ്ട് സ്വന്തം പാസ്‌പോർട്ട് തന്നെ നോട്ട്ബുക്കാക്കി മാറ്റിയ ഒരു വ്യക്തിയുടെ വീഡിയോ സമൂഹമാധ്യമങ്ങളിൽ തരംഗമാകുന്നു. കേരളത്തിൽ നിന്നുളളതാണ് ഈ സംഭവം. പാസ്‌പോർട്ടിന്‍റെ ഒഴിഞ്ഞ പേജുകളിൽ ഫോൺ നമ്പറുകളും കണക്കുകളും വീട്ടുവിശേഷങ്ങളും എഴുതിവെച്ചിരിക്കുന്ന ഒരു വീഡിയോയാണ് ഇപ്പോൾ വൈറലായിരിക്കുന്നത്.
സാധാരണയായി ആളുകൾ പാസ്‌പോർട്ട് അതികാവലോടെയാണ് സൂക്ഷിക്കാറുള്ളത്. എന്നാൽ ഈ പാസ്‌പോർട്ട് ഉടമയാകട്ടെ, വിസ സ്റ്റാമ്പ് ചെയ്യേണ്ട വിലപ്പെട്ട പേജുകൾ സ്വന്തം ആവശ്യങ്ങൾക്കായി ഉപയോഗിക്കുകയായിരുന്നു.
“നവീകരണത്തിനായി (Renewal) കൊണ്ടുവന്ന ഒരു വ്യക്തിയുടെ പാസ്‌പോർട്ട് കണ്ട് കേരളത്തിലെ പാസ്‌പോർട്ട് ഓഫീസർ ഞെട്ടിപ്പോയി” എന്ന ക്യാപ്ഷനോടെയാണ് വീഡിയോ പങ്കുവെക്കപ്പെട്ടിട്ടുള്ളത്.
വീഡിയോയിൽ പാസ്‌പോർട്ടിന്‍റെ പേജുകൾ മറിക്കുമ്പോൾ, അതിർത്തി കടന്നതിന്‍റെ സീലുകൾക്ക് പകരം വിലാസങ്ങളും ഫോൺ നമ്പറുകളും അടുക്കി വെച്ചിരിക്കുന്നതു കാണാം. ഫോൺ നമ്പറുകൾ മാത്രമല്ല, കണക്കൂട്ടലുകളും ചെലവുകളുടെ വിവരങ്ങളും പാസ്‌പോർട്ട് താളുകളിൽ എഴുതിയിട്ടുണ്ട്.
വളരെയധികം കൗതുകത്തോടെയും തമാശയോടെയുമാണ് സമൂഹമാധ്യമങ്ങൾ ഈ സംഭവത്തെ ഏറ്റെടുത്തത്. “പേപ്പർ ലാഭിക്കൂ, പ്രകൃതിയെ സംരക്ഷിക്കൂ! പാസ്‌പോർട്ട് ഉടമ ഒരു പരിസ്ഥിതി സ്നേഹിയായിരിക്കണം,” എന്ന് ഒരാൾ തമാശയായി കുറിച്ചു. കവറിന്‍റെ പഴക്കം കണ്ടപ്പോൾ ഇതൊരു പഴയതും കാലാവധി കഴിഞ്ഞതുമായ പാസ്‌പോർട്ട് ആയിരിക്കുമെന്നാണ് മറ്റൊരാൾ അഭിപ്രായപ്പെട്ടത്.
മുൻകാലങ്ങളിൽ സ്മാർട്ട്ഫോണുകൾ ഇല്ലാതിരുന്ന കാലത്ത് പോക്കറ്റ് ഡയറക്ടറികൾ കൊണ്ടുനടന്നിരുന്ന പഴയ തലമുറയ്ക്ക് ഇതിൽ യാതൊരു അത്ഭുതവും തോന്നില്ലെന്നും കമന്‍റുകൾ വന്നിട്ടുണ്ട്.
കേരളത്തിൽ നിന്ന് ഇത്തരത്തിൽ പാസ്‌പോർട്ട് നോട്ട്ബുക്കാക്കിയുള്ള വീഡിയോ വൈറലാകുന്നത് ഇത് ആദ്യമായല്ല. ഏതാനും വർഷങ്ങൾക്ക് മുൻപും ഒരപൂർവ്വ സംഭവം പുറത്തുവന്നിരുന്നു. അന്ന് ഒരു പ്രായമായ ആളുടെ പാസ്‌പോർട്ട് നിറയെ ഫോൺ നമ്പറുകളും പണമിടപാടുകളുടെ കണക്കുകളും പലവ്യഞ്ജനം വാങ്ങിയതിന്‍റെ കണക്കുകളുമായിരുന്നു കണ്ടെത്തിയത്. ബാങ്കിംഗ് ആപ്പുകളും ഡിജിറ്റൽ കുറിപ്പുകളും വരുന്നതിന് മുൻപ് ആളുകൾ എങ്ങനെ കാര്യങ്ങൾ കുറിച്ചുവെച്ചിരുന്നു എന്നതിന്‍റെ ഓർമപ്പെടുത്തലായിരുന്നു ആ വീഡിയോ.
ഔദ്യോഗിക രേഖകൾ ഇത്തരത്തിൽ ഉപയോഗിക്കുന്നത് വിദേശയാത്രകൾക്ക് തടസ്സമാകുമെങ്കിലും, നവമാധ്യമങ്ങളിൽ ഇതൊരു മികച്ച വിനോദമായിരിക്കുകയാണ്.
