കൊച്ചി: കൊച്ചിയുടെ ഹൃദയഭാഗത്തുള്ള പെന്റാ മേനക, ഒരു കാലത്ത് തിരക്കേറിയ സിനിമാ തിയേറ്ററായിരുന്നു. സിനിമ തുടങ്ങുന്നതിന് മുമ്പ് കോളാമ്പിയില് മുഴങ്ങിയ പാട്ടുകള് ഓര്മകളിലുള്ള തലമുറ ഇപ്പോഴും കൊച്ചിയിലുണ്ട്. നീലക്കുയില്, ഒരാള് കൂടി കള്ളനായി തുടങ്ങിയ സിനിമകള് മേനക തിയേറ്ററിലാണ് റിലീസ് ചെയ്തത്. ഭാര്യ, റെബേക്ക, പാലാട്ട് കോമന് തുടങ്ങിയ സിനിമകള് പത്മ തിയേറ്ററിലാണു റിലീസ് ചെയ്തെന്ന് പഴയ സിനിമാപ്രേമികള് ഓര്ക്കുന്നു.
നിരവധി സിനിമകള്ക്കു പശ്ചാത്തലമായ പശ്ചിമകൊച്ചി, മട്ടാഞ്ചേരി, വൈപ്പിന്, കുമ്പളങ്ങി, നെടുങ്ങാട് ദ്വീപ്, വീരന്പുഴ, മറൈന് ഡ്രൈവ്, പൊക്കാളി പാടങ്ങള്… എന്നിവിടങ്ങളിലേക്ക് ഇനിയും മലയാള സിനിമ ചിത്രീകരണങ്ങള് എത്തും. രാജ്യത്തെ പ്രഥമ ടൂറിസം ഗ്രാമം എന്നറിയപ്പെടുന്ന കുമ്പളങ്ങി ദ്വീപ് കാമറാ ക്ലിക്കുകളുടെ പറുദീസയാണ്.
കണ്ടല്ക്കാടുകളും, കായല്പ്പരപ്പുകള്ക്കിടയിലെ മനോഹരമായ ചീനവലകളുമെല്ലാം ചേര്ന്ന് ഭംഗിയുള്ള സിനിമാ ലൊക്കേഷനുകള് ഒരുക്കുന്ന കുമ്പളങ്ങിയോടു കിടപിടിക്കാന് കൊച്ചിയിലെ മറ്റു തീരപ്രദേശങ്ങളും കിഴക്കന് മേഖലയില് മലയോര ഗ്രാമങ്ങളുമുണ്ട്.
