കൊച്ചി: വസ്ത്ര വ്യാപാര ശൃംഖലയായ സുഡിയോ അവതരിപ്പിക്കുന്ന സുഡിയോ– ഫാഷന് ഗിഫ്റ്റ് എന്ന മത്സരത്തിന്റേതെന്ന പേരില് പ്രചരിക്കുന്ന ലിങ്ക് വ്യാജമെന്ന് പോലീസ് മുന്നറിയിപ്പ്. ഇത്തരം ലിങ്കുകളില് ക്ലിക്ക് ചെയ്താല് പണം നഷ്ടമാകാന് സാധ്യതയുണ്ടെന്നാണ് സൈബര് പോലീസ് മുന്നറിയിപ്പ് നല്കുന്നത്.
ലിങ്കില് ക്ലിക്ക് ചെയ്താല് കാണുന്ന ചോദ്യോത്തരങ്ങളില് പങ്കെടുത്ത് തുടര്ന്നുള്ള നിര്ദേശങ്ങള് പാലിച്ചാല് 4,000 രൂപയുടെ ഗിഫ്റ്റ് കാര്ഡ് നേടാനുള്ള അവസരമുണ്ടെന്നാണ് ലിങ്കില് പറയുന്നത്. വ്യക്തിവിവരങ്ങളും ഇതിനായി നല്കാന് തട്ടിപ്പു സംഘം ആവശ്യപ്പെടുന്നുണ്ട്. തുടര്ന്ന് ഒടിപി ഷെയര് ചെയ്ത് തട്ടിപ്പ് നടത്തുന്നതാണ് ഇവരുടെ രീതി.
ക്ലിക്ക് ചെയ്യല്ലേ…
ഏത് കമ്പനിയുടേതെന്ന അവകാശവാദത്തോടെയാണോ ലിങ്ക് പ്രചരിക്കുന്നത്, അവരുടെ ഔദ്യോഗിക വെബ്സൈറ്റ് അഥവാ സമൂഹമാധ്യമ അക്കൗണ്ടുകള് പരിശോധിച്ച് യഥാര്ഥമാണോ അതോ തട്ടിപ്പാണോ എന്ന് എല്ലായ്പ്പോഴും ഉറപ്പാക്കണമെന്നാണ് പോലീസ് മുന്നറിയിപ്പിലുള്ളത്. വെബ്സൈറ്റുകള് പരിശോധിക്കുന്ന ടൂളുകള് ഉപയോഗിച്ചു നടത്തിയ അന്വേഷണത്തില് പ്രചരിക്കുന്ന ലിങ്ക്/ഡൊമെയ്ന് സുരക്ഷിതമല്ലെന്നും ഫിഷിംഗിന് ഉപയോഗിക്കുന്നതാണെന്നുമാണ് പോലീസ് കണ്ടെത്തിയത്.
അതിനാല് ഈ ലിങ്ക് തുറക്കുന്നതും വ്യക്തി വിവരങ്ങള് നല്കുന്നതും അപകടമാണ്. ചിലപ്പോള്, ഇങ്ങനെയുള്ള വ്യാജ ലിങ്കുകളില് പ്രവേശിക്കുന്നത് വഴി വൈറസോ മാല്വേറുകളോ ലിങ്ക് തുറക്കാന് ഉപയോഗിച്ച ഡിവൈസില് കയറാനും സാധ്യതയുണ്ട്. മാത്രമല്ല, വിവരങ്ങള് നല്കിയ ഉടന് തന്നെ ഇവര് ഒടിപി പങ്കുവയ്ക്കാന് ആവശ്യപ്പെടും. ഒടിപി വഴി പണം തട്ടിയെടുക്കലാണ് പിന്നിലുള്ളത്.
പരാതിപ്പെടാന് മടിക്കേണ്ട
പ്രചരിക്കുന്ന ലിങ്ക്/യുആര്എല്, ഡൊമെയ്ന് എന്നിവ ശ്രദ്ധിക്കുക. തട്ടിപ്പ് ലിങ്കുകളാണെങ്കില്, ചിലപ്പോള് കമ്പനിയുടെ പേരില് അക്ഷരത്തെറ്റുണ്ടായേക്കാം. കൃത്യമായ പേരിനു പകരം പരസ്പരബന്ധമില്ലാത്ത അക്ഷരങ്ങളോ സംഖ്യകളോ ആയിരിക്കും ഉണ്ടാവുക. യുആര്എല്ലിന്റെ അവസാന ഭാഗത്തുള്ളതാണ് യഥാര്ഥ ഡൊമെയ്ന്. ഇന്ത്യയില് സാധാരണ .com, .in എന്നിവയാണ് ഉപയോഗിക്കാറുള്ളത്.
ലിങ്ക് ഓപ്പണ് ആക്കി നോക്കിയവരാണെങ്കില് ഫോണില് മാല്വെയറുകള് ഇന്സ്റ്റാള് ആയിട്ടുണ്ടോയെന്ന് പരിശോധിക്കുക. ബാങ്കില്നിന്നു പണം പിന്വലിക്കുകയോ പിന്വലിക്കാനുള്ള ശ്രമങ്ങള് നടത്തുകയോ ചെയ്തിട്ടില്ല എന്നും ഉറപ്പാക്കണം. ഇത്തരത്തിലെന്തെങ്കിലുമുണ്ടായാല് സുരക്ഷയ്ക്കുവേണ്ട നടപടികള് കൈക്കൊള്ളുക. സാമ്പത്തിക തട്ടിപ്പില് അകപ്പെട്ടാല് ഉടനടി 1930 എന്ന നമ്പറില് വിളിച്ചറിയിക്കണം.
- സ്വന്തം ലേഖിക
