അമേരിക്കൻ മോഡൽ ജീവിതരീതികളിൽ നിന്ന് തികച്ചും വ്യത്യസ്തമായ ഒരു ബിഹാർ ഗ്രാമത്തിന്റെ പശ്ചാത്തലത്തിൽ പുതിയ ജീവിതം നയിക്കുന്ന ഒരു അമേരിക്കൻ യുവതിയുടെ വിശേഷങ്ങളാണ് ഇപ്പോൾ ഇൻസ്റ്റാഗ്രാമിൽ വൈറലാകുന്നത്. ഇന്ത്യക്കാരനായ ഭർത്താവിനൊപ്പം ബിഹാറിലെ ഗ്രാമത്തിൽ കഴിയുന്ന ഇവർ, തന്റെ ദൈനംദിന ജീവിതത്തിലെ കൊച്ചു കൊച്ചു കാര്യങ്ങൾ വീഡിയോകളിലൂടെ പങ്കുവെക്കുകയാണ്.
‘സിംഗ് ഫാമിലി’ എന്ന ഇൻസ്റ്റാഗ്രാം അക്കൗണ്ടിലൂടെയാണ് യുവതി ഗ്രാമീണ ജീവിതത്തിന്റെ ദൃശ്യങ്ങൾ പങ്കുവെക്കുന്നത്. വീട്ടുജോലികൾ ചെയ്യുന്നത് മുതൽ പാചകവും സ്കിൻകെയർ റൂട്ടീനുകളും വരെ ഈ വീഡിയോകളിൽ കാണാം.
മറ്റൊരു വീഡിയോയിൽ തങ്ങളുടെ വിവാഹ ചിത്രങ്ങളാണ് ഇവർ പങ്കുവെച്ചിട്ടുള്ളത്. പരമ്പരാഗത ഇന്ത്യൻ വസ്ത്രങ്ങൾ ധരിച്ചാണ് ദമ്പതികൾ ചിത്രങ്ങളിൽ പ്രത്യക്ഷപ്പെടുന്നത്. സാരി ധരിച്ച് താൻ ഉപയോഗിക്കുന്ന സൗന്ദര്യവർധക ഉത്പ്പന്നങ്ങളെക്കുറിച്ചും സ്കിൻകെയർ രീതികളെക്കുറിച്ചും വിവരിക്കുന്ന വീഡിയോയും സോഷ്യൽ മീഡിയയിൽ ഏറെ ശ്രദ്ധ നേടിയിട്ടുണ്ട്.
സാധാരണ ഗ്രാമീണ ജീവിതവുമായി യുവതി എത്രത്തോളം വേഗത്തിൽ പൊരുത്തപ്പെട്ടു എന്നതിൽ അത്ഭുതം പ്രകടിപ്പിച്ചുകൊണ്ട് നിരവധി പേരാണ് വീഡിയോയ്ക്ക് താഴെ കമന്റുകളുമായി എത്തുന്നത്.
“കൈകൊണ്ട് വസ്ത്രം അലക്കുന്നത് കൈകൾക്കുള്ള നല്ലൊരു വ്യായാമമാണ്” എന്ന് തമാശയായി ചിലർ കുറിച്ചപ്പോൾ, ഇന്ത്യയിലെ ശക്തമായ വെയിലിനെ പ്രതിരോധിക്കാൻ യുവതി ഉപയോഗിക്കുന്ന സൺസ്ക്രീനുകളെക്കുറിച്ച് ചിലർ സംശയം പ്രകടിപ്പിച്ചു. എന്തായാലും ബിഹാർ ഗ്രാമത്തിലെ ഈ അമേരിക്കൻ മരുമകളുടെ വീഡിയോകൾ ഇപ്പോൾ ഇന്റർനെറ്റിൽ വൻ ഹിറ്റാണ്.
