സോഷ്യൽ മീഡിയയിൽ വൈറലാകാൻ വേണ്ടി ആളുകൾ ജീവൻ പണയപ്പെടുത്തിയുള്ള സാഹസിക പ്രകടനങ്ങൾ നടത്തുന്ന സംഭവങ്ങൾ നിരവധിയാണ്. ഇപ്പോഴിതാ, യാത്രക്കാരുമായി നീങ്ങിക്കൊണ്ടിരുന്ന ഓടുന്ന ബസിൽ നിന്ന് ഡ്രൈവർ പുറത്തിറങ്ങി ഒപ്പം നടന്ന് ഡാൻസ് ചെയ്യുന്ന ഞെട്ടിക്കുന്ന വീഡിയോ ആണ് സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. റോഡ് സുരക്ഷയെക്കുറിച്ചുള്ള കടുത്ത ആശങ്കകളാണ് ഈ വീഡിയോ ഉയർത്തിയിരിക്കുന്നത്.
എക്സ് ഉപയോക്താവായ നിഖിൽ സെയ്നിയാണ് ഈ ദൃശ്യങ്ങൾ പങ്കുവെച്ചിരിക്കുന്നത്. “ഇതൊന്ന് നോക്കൂ, യാത്രക്കാർ ബസിനുള്ളിൽ ഇരിക്കുമ്പോൾ ഡ്രൈവർ പുറത്തിറങ്ങി റീൽസ് ഉണ്ടാക്കുകയാണ്! ഇതിലും ഭേദപ്പെട്ട കാര്യം, ബസിലുള്ള യാത്രക്കാർക്ക് പോലും ഇതിൽ യാതൊരു കുഴപ്പവും തോന്നുന്നില്ല എന്നതാണ്. ഇനി വല്ല അപകടവും സംഭവിച്ചാൽ ആരെയായിരിക്കും കുറ്റപ്പെടുത്തുക? സർക്കാരിനെ!” – അദ്ദേഹം കുറിച്ചു.
ഓൺലൈൻ പ്രശസ്തിക്കും റീൽസുകൾക്കും വേണ്ടി ആളുകൾ പൊതുസുരക്ഷയെ എത്രമാത്രം അവഗണിക്കുന്നു എന്നതിന്‍റെ തെളിവാണ് ഈ സംഭവമെന്ന് നിരവധി പേർ വിമർശിച്ചു. റോഡപകടങ്ങൾ വർധിക്കുന്നതിന് സോഷ്യൽ മീഡിയയിലെ ഇത്തരം പ്രവണതകളും ഒരു പ്രധാന കാരണമായി മാറുന്നുണ്ടെന്ന് സോഷ്യൽ മീഡിയയിൽ പ്രതിഷേധമുയർന്നിട്ടുണ്ട്. യാതൊരു സുരക്ഷാ മാനദണ്ഡങ്ങളും പാലിക്കാതെ ഡ്രൈവർമാരും യാത്രക്കാരും കാണിക്കുന്ന ഈ അശ്രദ്ധ വലിയൊരു ദുരന്തത്തിന് കാരണമായേക്കാമെന്നും ഉപയോക്താക്കൾ മുന്നറിയിപ്പ് നൽകുന്നു.
