വെള്ളിയാഴ്ച രാവിലെ മൈക്രോസോഫ്റ്റ് ഔട്ട്ലുക്കും മറ്റ് അനുബന്ധ സേവനങ്ങളും പണിമുടക്കിയതോടെ, ഓഫീസ് ജോലികളിൽ നിന്ന് മനസ്സുകൊണ്ട് അവധിയെടുക്കാനുള്ള സുവർണാവസരമായാണ് ജീവനക്കാർ ഇതിനെ കണ്ടത്. മൈക്രോസോഫ്റ്റിന്‍റെ സാങ്കേതിക തടസത്തെ ആഘോഷമാക്കി സോഷ്യൽ മീഡിയയിൽ മീമുകളുടെ പ്രളയമാണ് ഇപ്പോൾ നടക്കുന്നത്.
വെള്ളിയാഴ്ച ഏഴ് മണിക്കൂറിലധികം നേരമാണ് മൈക്രോസോഫ്റ്റ് 365, ഔട്ട്ലുക്ക്, ടീംസ് തുടങ്ങിയ സേവനങ്ങൾ ലോകമെമ്പാടുമുള്ള ആയിരക്കണക്കിന് ഉപയോക്താക്കൾക്ക് തടസപ്പെട്ടത്. മൈക്രോസോഫ്റ്റ് 365 കണക്ടറുകൾ വഴി പ്രവർത്തിക്കുന്ന ഓപ്പൺഎഐ, ആന്ത്രോപിക് എന്നിവയുടെ എഐ സേവനങ്ങളെയും ഈ തടസം ബാധിച്ചു.
ഇ-മെയിലുകൾ അയക്കാനും ടീംസ് മീറ്റിംഗുകളിൽ പങ്കെടുക്കാനും കഴിയാതായതോടെ, എല്ലാം ശരിയാകുന്നതുവരെ ഒന്നും ചെയ്യാതെ വെറുതെയിരിക്കാമെന്ന തമാശകളാണ് സോഷ്യൽ മീഡിയയിൽ നിറയുന്നത്. “ഔട്ട്ലുക്ക് പ്രവർത്തിക്കുന്നില്ല, ടീംസിന് പ്രശ്നങ്ങളുണ്ട്, മൈക്രോസോഫ്റ്റ് 365 പണിമുടക്കി – വെള്ളിയാഴ്ച തുടങ്ങാൻ ഇതിലും നല്ലൊരു വഴിയില്ല, എല്ലാവരും ലാപ്ടോപ്പ് അടച്ചുവെച്ച് ദിവസം ആഘോഷിക്കൂ” എന്നായിരുന്നു ഒരു ഉപയോക്താവിന്‍റെ പ്രതികരണം.
വാരാന്ത്യ അവധിക്ക് തൊട്ടുമുമ്പുള്ള ദിവസമായ വെള്ളിയാഴ്ച തന്നെ ഈ സാങ്കേതിക തടസം നേരിട്ടതാണ് തമാശകൾക്ക് ആക്കം കൂട്ടിയത്. പ്രധാനപ്പെട്ട മെയിലുകൾ അയക്കാനോ മീറ്റിംഗുകളിൽ പങ്കെടുക്കാനോ സാധിക്കാത്തതിനാൽ ജോലിയിൽ നിന്ന് മാറിനിൽക്കാൻ തികച്ചും ന്യായമായ ഒരു കാരണമാണ് ജീവനക്കാർക്ക് ഇതിലൂടെ ലഭിച്ചത്.
ഡൗൺഡിറ്റക്ടർ കണക്കുകൾ പ്രകാരം വെള്ളിയാഴ്ച പുലർച്ചെ 1.30-ഓടെയാണ് ഔട്ട്ലുക്ക് പ്രശ്നങ്ങൾ ഏറ്റവും രൂക്ഷമായത്; ഏകദേശം 1,38,058 പരാതികളാണ് ഈ സമയത്ത് രേഖപ്പെടുത്തിയത്. പുലർച്ചെ 4.30-ഓടെ പരാതികളുടെ എണ്ണം 34,490 ആയി കുറഞ്ഞെങ്കിലും ആയിരക്കണക്കിന് ആളുകൾക്ക് പിന്നെയും തടസങ്ങൾ നേരിട്ടു. സെർവറുകൾ പുനഃസ്ഥാപിക്കാനുള്ള ശ്രമങ്ങൾ തുടരുകയാണെന്ന് മൈക്രോസോഫ്റ്റ് പുലർച്ചെ 3.30-ന് പുറത്തിറക്കിയ പ്രസ്താവനയിൽ അറിയിച്ചിരുന്നു. തുടർന്ന് സേവനങ്ങൾ ഘട്ടംഘട്ടമായി സാധാരണ നിലയിലായിത്തുടങ്ങി.
അത്യാവശ്യമായി ഇ-മെയിലുകളും മറ്റ് ടൂളുകളും ഉപയോഗിക്കേണ്ട ജീവനക്കാർക്ക് ഈ തടസം വലിയ ബുദ്ധിമുട്ടുണ്ടാക്കിയെങ്കിലും, മീം നിർമാതാക്കൾക്ക് ഇതൊരു ആഘോഷമായിരുന്നു. ഓഫീസിലെ പ്രധാന ആശയവിനിമയ സംവിധാനങ്ങൾ തന്നെ നിലച്ച സ്ഥിതിക്ക്, ജോലിയും അല്പം കാത്തിരിക്കട്ടെ എന്ന നിലപാടിലായിരുന്നു ഇന്‍റർനെറ്റ് ലോകത്തെ ഒരു വിഭാഗം.
