ഏഴാം വയസു മുതൽ കേൾവിശക്തിയില്ലാത്ത വെല്ലുവിളിയെ അതിജീവിച്ച് ഹരിയാനയിൽ നിന്നുള്ള ബാങ്ക് മാനേജർ പ്രദീപ് മുണ്ഡേജ 5,364 മീറ്റർ ഉയരമുള്ള എവറസ്റ്റ് ബേസ് ക്യാമ്പ് ട്രെക്ക് വിജയകരമായി പൂർത്തിയാക്കി.
മാസങ്ങളുടെ കഠിനമായ പരിശീലനത്തിനൊടുവിൽ ഹിമാലയത്തിലെ 130 കിലോമീറ്റർ വരുന്ന ദുർഘടമായ പാത താണ്ടിയാണ് ഒക്ടോബർ 13-ന് പ്രദീപ് ഈ ചരിത്രനേട്ടം കൈവരിച്ചത്. ഹരിയാനയിലെ കർണാലിൽ പഞ്ചാബ് നാഷണൽ ബാങ്കിന്റെ സർക്കിൾ ഓഫീസിൽ ചീഫ് മാനേജരായി ജോലി ചെയ്യുകയാണ് പ്രദീപ്.
കഠിനമായ തണുപ്പ്, കുറഞ്ഞ ഓക്സിജൻ അളവ്, കുത്തനെയുള്ള കയറ്റങ്ങൾ എന്നിവയെയെല്ലാം തരണം ചെയ്താണ് അദ്ദേഹം ഈ ലക്ഷ്യത്തിലെത്തിയത്. വെല്ലുവിളികൾ ജീവിതത്തിന്റെ ഭാഗമാണെങ്കിലും അവ നമ്മുടെ ലക്ഷ്യങ്ങളെ നിശ്ചയിക്കില്ലെന്ന് ഈ നേട്ടത്തിലൂടെ അദ്ദേഹം തെളിയിച്ചു. “സ്വപ്നങ്ങൾക്ക് കാലാവധി തീരുന്നില്ല” എന്ന ശക്തമായ സന്ദേശമാണ് പ്രദീപ് ഈ യാത്രാനുഭവത്തിലൂടെ പങ്കുവെച്ചിരിക്കുന്നത്. സോഷ്യൽ മീഡിയയിലും പഞ്ചാബ് നാഷണൽ ബാങ്കിന്റെ ഔദ്യോഗിക പേജിലും പ്രദീപിന്‍റെ ഈ വലിയ നേട്ടത്തിന് വൻ സ്വീകരണമാണ് ലഭിക്കുന്നത്.
