പണവും ആഡംബര ജീവിതവും ഉണ്ടായിട്ടും പ്രവാസലോകത്തെ ഏകാന്തത ആളുകളെ എത്രയധികം വേട്ടയാടുന്നു എന്നതിന്റെ നേർക്കാഴ്ചയായി അമേരിക്കയിൽ നിന്നുള്ള ഒരു ഇന്ത്യൻ ഷെഫിന്റെ വീഡിയോ. അമേരിക്കയിൽ നാല് വർഷമായി ജോലി ചെയ്യുന്ന കാർത്തിക് ചൗഹാൻ എന്ന ഷെഫാണ് ദീപാവലി ദിനത്തിൽ താൻ അനുഭവിച്ച കടുത്ത ഏകാന്തതയെക്കുറിച്ച് തുറന്നുപറഞ്ഞ് രംഗത്തെത്തിയത്.
ആഡംബര വീടും മുസ്റ്റ്ങ് കാറും ഉയർന്ന ശമ്പളമുള്ള ജോലിയുമെല്ലാം സ്വന്തമായുണ്ടെങ്കിലും പ്രവാസ ജീവിതത്തിലെ ആഘോഷങ്ങളില്ലാത്ത രാവുകൾ തന്നെ മാനസികമായി തളർത്തുന്നുവെന്നാണ് കാർത്തിക് വീഡിയോയിൽ വ്യക്തമാക്കുന്നത്. രാത്രി എട്ടര മണിക്ക് പോലും വിജനമായി കിടക്കുന്ന അമേരിക്കൻ തെരുവുകളെയും വീടുകളെയും വീഡിയോയിൽ കാണാം. “എന്റെ കൈവശം എല്ലാം ഉണ്ട്, എന്നാൽ സംസാരിക്കാൻ ആരുമില്ല. പണം കൊണ്ട് സന്തോഷം വാങ്ങാൻ കഴിയില്ലെന്നും, യഥാർത്ഥ സന്തോഷം മാതാപിതാക്കൾക്കും പങ്കാളിക്കും ഒപ്പമുള്ള ജീവിതമാണെന്നും” കാർത്തിക് പറയുന്നു. സോഷ്യൽ മീഡിയയിൽ വൈറലായ ഈ വീഡിയോ പ്രവാസികളുടെ ജീവിതത്തെക്കുറിച്ചും പണവും കുടുംബബന്ധങ്ങളും തമ്മിലുള്ള സന്തുലിതാവസ്ഥയെക്കുറിച്ചും വലിയ ചർച്ചകൾക്കാണ് തുടക്കമിട്ടിരിക്കുന്നത്.
