മലേഷ്യ: സുൽത്താൻ അസ്‌ലന്‍ഷാ കപ്പ് 2025 പുരുഷ ഹോക്കി അവസാന റൗണ്ട് റോബിൻ മത്സരത്തിൽ തകർപ്പൻ ജയത്തോടെ ഫൈനൽ പ്രവേശനം നേടി ഇന്ത്യ. മലേഷ്യയിലെ ഇപ്പോയിൽ നടന്ന മത്സരത്തിൽ കാനഡയെ 14-3ന് പരാജയപ്പെടുത്തിയാണ് ഇന്ത്യ ഫൈനലിൽ കടന്നത്.
നാല് ഗോളുകൾ നേടിയ ഡിഫൻഡർ ജുഗ്രാജ് സിംഗ് ആണ് ഇന്ത്യയുടെ ടോപ് സ്കോറർ. മൂന്ന് പെനാൽറ്റി കോർണറുകൾ ജുഗ്രാജ് ഗോളാക്കി മാറ്റി. അഭിഷേക്, അമിത് രോഹിദാസ്, രജീന്ദർ സിംഗ് എന്നിവർ രണ്ട് ഗോളുകൾ വീതം നേടിയപ്പോൾ, സെൽവം കാർത്തി, നീലകണ്ഠ ശർമ, സഞ്ജയ്, ദിൽപ്രീത് സിംഗ് എന്നിവർ ഓരോ ഗോളുകൾ നേടി.
ക്രെയ്ഗ് ഫുൾട്ടണ്‍ പരിശീലിപ്പിക്കുന്ന ടീം ഇന്നു നടക്കുന്ന ഫൈനലിൽ ബെൽജിയത്തെ നേരിടും. റൗണ്ട് റോബിൻ ഘട്ടത്തിൽ ഇന്ത്യക്ക് ഏക തോൽവി സമ്മാനിച്ച എതിരാളിയാണ് ഫൈനൽ പോരാട്ടിത്തിനുമെത്തുന്നത്. ടൂർണമെന്‍റിൽ തോൽവി അറിയാത്ത ബെൽജിയം ന്യൂസിലൻഡിനെ 5-1ന് തകർത്താണ് ഒന്നാം സ്ഥാനക്കാരായി ഫൈനലിൽ പ്രവേശിച്ചത്.
