പൊതുവേ, സ്ഥിരമായ (Fixed) അലര്ജിയില് എല്ലാത്തരം ശ്വസന അലര്ജികളും ഉള്പ്പെടുന്നു, അറിയപ്പെടുന്നിടത്തോളം, പ്രാണികളുടെ കുത്ത്, ചില മരുന്നുകളോടുള്ള അലര്ജി എന്നിവയും ഉള്പ്പെടുന്നു. ചില തരത്തിലുള്ള ഭക്ഷണ അലര്ജികളും ഈ വിഭാഗത്തില് പെടുന്നു. ഇത്തരത്തിലുള്ള അലര്ജി പദാര്ഥവുമായി സമ്പര്ക്കം കഴിഞ്ഞ് നിമിഷങ്ങള്ക്കുള്ളില് പെട്ടെന്നുള്ള ഒരു പ്രതികരണമായി പ്രത്യക്ഷപ്പെടുന്നു. രോഗി അലര്ജി ഉള്ള പദാര്ഥവുമായി ഓരോ പ്രാവശ്യവും സമ്പര്ക്കത്തില് വരുമ്പോഴെല്ലാം ഇത് സാധാരണയായി സംഭവിക്കുന്നു. ഇത്തരത്തിലുള്ള അലര്ജി ജീവനു ഭീഷണിയാകാം, അതുകൊണ്ട് ഏറ്റവും സൂക്ഷ്മമായ നിയന്ത്രണം ആവശ്യമാണ്.
സൈക്ലിക് അഥവാ ചാക്രിക അലര്ജി
ഫിക്സ്ഡ് അഥവാ സ്ഥിരമായ അലര്ജി അല്ലാത്ത എല്ലാ തരം അലര്ജികളെയും സൈക്ലിക് അഥവാ ചാക്രിക അലര്ജി എന്നു പറയാം. ഇവയിലും ഭക്ഷണം, ശ്വസന അലര്ജി എന്നിവ ഉൾപ്പെടാം. ഇത്തരത്തിലുള്ള അലര്ജി വസ്തുവിന്റെ അളവിനെയും എത്ര ആവൃത്തി ഇതുമായി സമ്പര്ക്കത്തില് വരുന്നു എന്നതിനെയും ആശ്രയിച്ചിരിക്കുന്നു. പദാര്ഥവുമായുള്ള സമ്പര്ക്കം ആവര്ത്തിച്ചുണ്ടായില്ലെങ്കില് ചെറിയ അളവിലുള്ള സമ്പര്ക്കം അലര്ജി ഉണ്ടാക്കാതെ കടന്നു പോയേക്കാം.
കാരണവും ഫലവും തമ്മിലുള്ള വ്യക്തമായ ബന്ധം ഉണ്ടാകാത്തതിനാല് ചാക്രിക അലര്ജി നിശബ്ദവും തിരിച്ചറിയാന് പ്രയാസവുമാണ്. പദാര്ഥവുമായി സമ്പര്ക്കത്തില് വന്നതിനു ശേഷവും രോഗിക്ക് താല്ക്കാലികമായി ലക്ഷണങ്ങള് ഒന്നും ഉണ്ടായില്ലെങ്കിലും മൊത്തത്തിലുള്ള പ്രഭാവം ദോഷകരമായേക്കാം.
ഏത് അവയവത്തെയും ബാധിക്കുമോ?
അലര്ജി ശരീരത്തിന്റെ ഏത് ഭാഗത്തെയും ബാധിക്കാം. ചെവി, മൂക്ക്, തൊണ്ട എന്നിവ അലര്ജി ഉണ്ടാക്കുന്ന വസ്തുക്കള്ക്ക് പ്രവേശിക്കാനുള്ള വഴികളാണ്. കൂടാതെ അഞ്ച് ഇന്ദ്രിയങ്ങളില് നാലെണ്ണം പ്രധാനമായും ചെവി, മൂക്ക്, തൊണ്ട ഭാഗങ്ങളില് അധിഷ്ഠിതമായതിനാല്, ഒരു പ്രധാന ബന്ധം പ്രതീക്ഷിക്കാം. അത് വാസ്തവത്തില് നിലനില്ക്കുകയും ചെയ്യുന്നു.
ഇന്ദ്രിയങ്ങളെ ബാധിക്കുന്ന ബുദ്ധിമുട്ടുകൾക്ക് രോഗികള് പെട്ടെന്നു തന്നെ ഡോക്ടറുമായി ബന്ധപ്പെടുന്നതാണ്. അലര്ജിയുടെ ലക്ഷണങ്ങള് വളരെ വിശാലമാണ്. ഇത് ശരീരത്തിന്റെ ഏതു ഭാഗത്തെ ബാധിക്കുന്നു എന്നതിനെ ആശ്രയിച്ചിരിക്കുന്നു.
ഉണങ്ങിയ ചുമയും അലർജിയും തമ്മിൽ
കുട്ടികളില് ജലദോഷത്തിനു പല കാരണങ്ങളുണ്ട്. ഈ ജലദോഷങ്ങളില് 50%വും അലര്ജി മൂലമാണ് ഉണ്ടാകുന്നത്. മൂക്ക്, ചെവി, അണ്ണാക്ക് അല്ലെങ്കില് തൊണ്ടയിലെ ചൊറിച്ചില്, തുമ്മല്, മൂക്കൊലിപ്പ്, മൂക്കടപ്പ്, കൂർക്കംവലി, വായ തുറന്നുള്ള ശ്വസനം, സൈനസ് മൂലമുള്ള തലവേദന, ചെവി അടപ്പ്, ചെവി വേദന, ചുമ, ഇടയ്ക്കിടയ്ക്കുള്ള തൊണ്ട കാറല്, ഉണങ്ങിയ ചുമ, ഉറക്കാകുറവ്, അതുമൂലം പകല് സമയത്തുള്ള ക്ഷീണം എന്നിവ അലർജിക് റിനൈറ്റിസിന്റെ ( Rhinitis) ചില ലക്ഷണങ്ങളാണ്. ആസ്ത്മ, ശ്വാസംമുട്ടൽ എന്നിവയ്ക്കും മൂലകാരണം അലര്ജി തന്നെയാണ്.
(തുടരും)
