ലോസ് ആഞ്ചലസ്: ആരോഗ്യ കാരണങ്ങളാൽ അന്താരാഷ്ട്ര ബഹിരാകാശ സ്റ്റേഷനിൽനിന്നു നാസ ഒഴിപ്പിച്ച നാലു സഞ്ചാരികൾ ഭൂമിയിൽ തിരിച്ചെത്തി. സഞ്ചാരികളെ വഹിച്ച സ്പേസ് എക്സിന്റെ ഡ്രാഗൺ പേടകം ഇന്നലെ അമേരിക്കയിലെ കലിഫോർണിയയ്ക്കു സമീപം കടലിൽ പതിച്ചു. കടലിൽ കാത്തുകിടന്നിരുന്ന ബോട്ടുകളിലേക്ക് സഞ്ചാരികളെ മാറ്റി കരയ്ക്കെത്തിച്ചു.
അമേരിക്കയിലെ സീന കാർഡ്മാൻ, മൈക്ക് ഫിൻകെ, റഷ്യയിലെ ഒലെഗ് പ്ലാറ്റോനോവ്, ജപ്പാനിലെ കിമിയ യുയി എന്നീ ബഹിരാകാശ സഞ്ചാരികളാണു തിരിച്ചെത്തിയത്. ഇതിൽ ഒരാൾക്ക് ആരോഗ്യപരമായ അടിയന്തരാവസ്ഥ ഉണ്ടായി എന്നാണ് റിപ്പോർട്ട്. ഇതാരാണെന്നു നാസ വെളിപ്പെടുത്തിയിട്ടില്ല. സീന കാർഡ്മാനും മൈക്ക് ഫിൻകെയും ഒരാഴ്ച മുന്പ് നിശ്ചയിച്ചിരുന്ന ബഹിരാകാശ നടത്തം നാസ റദ്ദാക്കിയിരുന്നു.
നാലു പേരും ഫെബ്രുവരിയിലാണു ബഹിരാകാശ സ്റ്റേഷനിൽനിന്നു മടങ്ങേണ്ടിയിരുന്നത്. വൈദ്യസംബന്ധമായ കാരണങ്ങളാൽ ബഹിരാകാശ സ്റ്റേഷനിൽനിന്ന് സഞ്ചാരികളെ തിരിച്ചുകൊണ്ടുവരുന്ന ആദ്യസംഭവമാണിത്.
