കണ്ണൂര്: സിപിഎം ജില്ലാ കമ്മിറ്റിയംഗമായിരുന്ന വി. കുഞ്ഞികൃഷ്ണന്റെ വെളിപ്പെടുത്തലിനെത്തുടര്ന്ന് പ്രതിരോധത്തിലായ പയ്യന്നൂര് സിപിഎം നേതൃത്വത്തിന്റെ വിശദീകരണത്തില് തൃപ്തരാകാതെ അണികള്. കൃത്യമായ കണക്ക് വയ്ക്കണമെന്ന ആവശ്യങ്ങള് ബ്രാഞ്ചുകളില്നിന്ന് ഉയര്ന്നതോടെ വെട്ടിലായത് നേതൃത്വമാണ്.
ജില്ലാ കമ്മിറ്റി തീരുമാനങ്ങള് ലോക്കല് ജനറല് ബോഡിയില് അവതരിപ്പിച്ച ശേഷം ഇതേപ്പറ്റിയുള്ള ചര്ച്ചകള്ക്കായി വിളിച്ച ബ്രാഞ്ച് യോഗങ്ങളിലാണു ജില്ലാ കമ്മിറ്റിയുടെ വിശദീകരണത്തില് തൃപ്തരാകാത്ത അണികള് കൃത്യതയുള്ള കണക്കുകള് വേണമെന്ന ആവശ്യമുന്നയിച്ചത്.
അംഗങ്ങളാവശ്യപ്പെട്ട പ്രകാരമുള്ള കണക്കുകള് നേതാക്കളുടെ കൈയിലില്ലായിരുന്നു. വര്ഷങ്ങള്ക്കു മുമ്പ് ഇതേ വിഷയത്തില് വിശദീകരണം നല്കിയപ്പോഴും കണക്കുകള് വച്ചിരുന്നില്ല. ഇപ്പോള് മേല് കമ്മിറ്റി തീരുമാനങ്ങള് വിശദീകരിക്കാനെത്തിയപ്പോഴും അതില് കണക്കുകളില്ലായിരുന്നു. അതിനാലാണു കാര്യങ്ങള്ക്കു കൂടുതല് വ്യക്തത വരുത്തുന്നതിനായി അണികള് കൃത്യതയുള്ള കണക്കുകള് ആവശ്യപ്പെട്ടത്.
കോറോം കൂര്ക്കര ബ്രാഞ്ചില് അംഗങ്ങളെത്താതിരുന്നതിനാല് ജില്ലാ കമ്മിറ്റി തീരുമാനങ്ങള് വിശദീകരിക്കാനായി വിളിച്ചുചേര്ത്ത ബ്രാഞ്ച് യോഗം നടത്താനുമായില്ല. പയ്യന്നൂര് എരിയയിലെ ഭൂരിഭാഗം ലോക്കല് കമ്മിറ്റികളിലും കുഞ്ഞികൃഷ്ണനനുകൂലമായ തരംഗം രൂപപ്പെട്ടുവെന്നാണു പുറത്തുവരുന്ന വിവരം.
പാര്ട്ടി നേതൃത്വം നല്കുന്ന വിശദീകരണത്തേക്കാളും കുഞ്ഞികൃഷ്ണന്റെ വെളിപ്പെടുത്തലുകളാണ് സിപിഎം അണികളിലെത്തിയതെന്ന് വെളിവാക്കുന്ന സംഭവങ്ങളാണ് നടക്കുന്നത്. കുഞ്ഞികൃഷ്ണന്റെ ചോദ്യങ്ങളുടെ പ്രതിധ്വനി യോഗങ്ങളില് മുഴങ്ങുമ്പോള് കൃത്യതയുള്ള മറുപടി നല്കാനാകാതെ വിഷമിക്കുകയാണ് റിപ്പോര്ട്ടിംഗിനായി നിയോഗിക്കപ്പെട്ട നേതാക്കള്.
