തന്റെ ആദ്യസിനിമയുടെ സംവിധായകന് സനോജ് മിശ്രയില്നിന്ന് ദുരനുഭവം ഉണ്ടായെന്ന ആരോപണവുമായി കുംഭമേള വൈറല്താരം മൊണാലിസ ഭോസ്ലെ. ദുരുദ്ദേശ്യത്തോടെ ദേഹത്ത് സ്പര്ശിച്ചെന്നും നേപ്പാളിലും മുംബൈയിലും വച്ച് ദുരനുഭവം നേരിട്ടുവെന്നും അവർ പറഞ്ഞു. വീട്ടുകാരോട് പറഞ്ഞെങ്കിലും ആദ്യ സിനിമയല്ലേ, പുറത്തുപറയേണ്ടെന്നാണ് ഉപദേശിച്ചത്.
ഈ സനോജ് മിശ്രയാണ് ഇപ്പോള് തങ്ങള്ക്കെതിരേ നുണ പ്രചരിപ്പിക്കുന്നത്. ഇയാള്ക്കെതിരേ പരാതി നല്കുന്നതടക്കമുള്ള കാര്യങ്ങള് ആലോചനയിലാണെന്നും അവർ വ്യക്തമാക്കി. ഭര്ത്താവ് ഫര്മാന് ഖാനെതിരേ യുപി പോലീസ് രജിസ്റ്റര് ചെയ്ത കേസില് അറസ്റ്റ് തടഞ്ഞുള്ള ഹൈക്കോടതി ഉത്തരവിനെക്കുറിച്ച് പറയാന് എറണാകുളം പ്രസ്ക്ലബ്ബില് വിളിച്ചുചേര്ത്ത പത്രസമ്മേളനത്തിലായിരുന്നു പ്രതികരണം.
മൊണാലിസയ്ക്ക് 18 വയസായിട്ടില്ലെന്നും മകളെ തട്ടിക്കൊണ്ടുപോയതാണെന്നും കാട്ടി വീട്ടുകാര് നല്കിയ പരാതിയില് കഴിഞ്ഞ ദിവസമാണ് യുപി പോലീസ് ഫര്മാന് ഖാനെതിരേ കേസെടുത്തത്. മാര്ച്ച് 11ന് തിരുവനന്തപുരം അരുമാനൂര് നയിനാര് ദേവ ക്ഷേത്രത്തിലായിരുന്നു ഇന്ഡോര് സ്വദേശിയായ മൊണാലിസ ഭോസ്ലെയും കാമുകന് ഫര്മാന് ഖാനും തമ്മിലുള്ള വിവാഹം നടന്നത്.
തന്നെ ഫര്മാന് തട്ടിക്കൊണ്ടുവന്നതല്ല. തനിക്ക് 18 വയസ് പൂര്ത്തിയായതാണ്. മതം നോക്കിയല്ല തങ്ങള് പ്രണയിച്ചതെന്നും മൊണാലിസ പറഞ്ഞു. മൊണാലിസയുടെ ജനന സര്ട്ടിഫിക്കറ്റ് വ്യാജമായി നിര്മിച്ചിട്ടില്ലെന്ന് ഫര്മാന് പറഞ്ഞു.
