മാതമംഗലം: പരുത്ത പ്രതലങ്ങളിലൂടെ സാഹസികമായി വണ്ടിയോടിക്കുന്നവർ കടന്നപ്പള്ളി പഞ്ചായത്തിലെ ആലക്കാട് ഏഴുംവയലിലേക്ക്. കേരള അഡ്വഞ്ചർ ട്രോഫി സീസൺ 7 സംസ്ഥാന ചാമ്പ്യൻഷിപ്പിനാണ് നാളെ തുടക്കമാകുന്നത്. ഏഴുംവയലിൽ അന്താരാഷ്ട്ര നിലവാരത്തിലുള്ള ട്രാക്ക് ഒരുങ്ങിക്കഴിഞ്ഞു.
കേരള മോട്ടോർ സ്പോർട്സ് വെൽഫെയർ സൊസൈറ്റി, രാജസ്ഥാൻ മോട്ടോർ സ്പോർട്സ് എന്നിവയാണ് സംഘാടകർ. ഫൈനൽ ഞായറാഴ്ചയാണ്. ജേതാക്കൾക്ക് 12 ലക്ഷം രൂപയാണ് സമ്മാനം. ഓഫ് റോഡ് സ്പോർട്സിനെയും സാഹസിക കൃത്യങ്ങളെയും പ്രോത്സാഹിപ്പിക്കാനാണ് മത്സരം.
രാജ്യത്തിന്റെ വിവിധ ഭാഗങ്ങളിൽ നിന്നുള്ള പ്രമുഖ ഡ്രൈവർമാരും മത്സരത്തിന് എത്തും. ഒന്പത് കാറ്റഗറികളിലായി 150 പേരാണ് മത്സരിക്കുക. പങ്കെടുക്കുന്ന എല്ലാവർക്കും ഇൻഷൂറൻസ് പരിരക്ഷയുണ്ട്. കാണാൻ വരുന്നവർക്കും സുരക്ഷാ മുൻകരുതലുകൾ ഒരുക്കിയിട്ടുണ്ട്.
എം. വിജിൽ എംഎൽഎയുടെ ഇടപെടലിലാണ് കേരള അഡ്വഞ്ചർ ട്രോഫി ഇവിടെ നടക്കുന്നത്. ഇന്ത്യൻ മോട്ടോർ സ്പോർട്സിന്റെ നെടുംതൂണായ ഹരിസിംഗിന്റെ ഓർമയ്ക്കായി പ്രദേശത്തിന് ഹരിസിംഗ് നഗർ എന്ന പേരിട്ടു. മത്സരത്തിന്റെ പ്രമോഷണൽ വീഡിയോ പുറത്തിറക്കിയത് മോഹൻലാലാണ്.
