കൊച്ചി: കൊച്ചിയില് പുലരുവോളം ഡിജെ പാര്ട്ടികള് നടക്കുന്ന ഹോട്ടലുകള്ക്ക് പോലീസ് നോട്ടീസ്. നിയന്ത്രണങ്ങളേര്പ്പെടുത്തിയിട്ടും ഇതുപാലിക്കാത്ത സാഹചര്യത്തില് ചില കേസുകളും പോലീസ് രജിസ്റ്റര് ചെയ്തതായി സിറ്റി പോലീസ് കമ്മീഷണര് പറഞ്ഞു. ഡിജെ പാര്ട്ടികള് നടക്കുന്ന സ്ഥലങ്ങളില് രഹസ്യ പോലീസിന്റെ ഉള്പ്പെടെ നിരീക്ഷണം ശക്തമാക്കാനാണ് പോലീസിന്റെ നീക്കം.
ഡിജെ പാര്ട്ടികള് രാത്രി 11ന് തന്നെ അവസാനിപ്പിക്കണമെന്ന് എറണാകുളം സെന്ട്രല് എസിപി കഴിഞ്ഞദിവസം പുറത്തിറക്കിയ ഉത്തരവില് വ്യക്തമാക്കിയിരുന്നു. ഇതിനുപുറമെ ബാറുകള് രാത്രി 12ന് അടയ്ക്കണമെന്നും എസിപിയുടെ ഉത്തരവില് പറഞ്ഞിരുന്നു.
നഗരത്തില് പുലര്ച്ചെ വരെ നീളുന്ന ഡിജെ പാര്ട്ടികളെക്കുറിച്ച് വ്യാപക പരാതികള് ഉയര്ന്ന സാഹചര്യത്തിലാണ് പോലീസ് നിയന്ത്രണം കടുപ്പിച്ചത്.
ലഹരി മരുന്നിന്റെ ഉപയോഗം തടയുന്നതിനും ക്രമസമാധാന പ്രശ്നങ്ങള് ഒഴിവാക്കുന്നതിനുമായാണ് സമയപരിധി കടുപ്പിച്ചിരിക്കുന്നത്. നിര്ദേശങ്ങള് ലംഘിക്കുന്ന സ്ഥാപനങ്ങള്ക്കെതിരെ കര്ശന നടപടി സ്വീകരിക്കാനാണ് പോലീസ് നീക്കം. അടുത്തിടെ ലഹരി കേസില് അറസ്റ്റിലായ പ്രതി ഇത്തരം പാര്ട്ടികളിലേക്ക് ലഹരി എത്തിച്ചിരുന്നതായി പോലീസ് കണ്ടെത്തിയിരുന്നു.
