ബംഗളൂരു: ടോക്സിക്- എ ഫെയറി ടെയിൽ ഫോർ ഗ്രോൺ അപ്സ് സിനിമയുടെ ഷൂട്ടിങ് അനുഭവങ്ങൾ പങ്കുവെച്ച് ബോളിവുഡ് താരം കിയാര അദ്വാനി. ചിത്രത്തിന്റെ സംവിധായിക ഗീതു മോഹൻദാസ് സെറ്റിൽ കർശനമായ ‘നോ പ്ലസന്റീസ് നിയമം നടപ്പിലാക്കിയിരുന്നതായി താരം വെളിപ്പെടുത്തി.
‘ഞാൻ സാധാരണയായി ഷൂട്ടിങ് സെറ്റിൽ എത്തിയാൽ എല്ലാവരോടും വളരെ സൗഹൃദത്തോടെ പെരുമാറുന്ന, ‘ഗുഡ് മോർണിംഗ്, എന്തൊക്കെയുണ്ട് വിശേഷങ്ങൾ’ എന്ന് ചോദിക്കുന്ന ഒരാളാണ്. എന്നാൽ ഗീതു എന്നോട് പറഞ്ഞത്, സെറ്റിലേക്ക് വരുമ്പോൾ ഈ വക സൗഹൃദസംഭാഷണങ്ങൾ എല്ലാം പൂർണമായും ഒഴിവാക്കണമെന്നാണ്. കഥാപാത്രത്തിന്റെ മൂഡിലേക്ക് പൂർണമായും ശ്രദ്ധ കേന്ദ്രീകരിക്കാൻ വേണ്ടിയായിരുന്നു അത്. ‘ഹായ്, ഹലോ’കൾ ഒന്നും പാടില്ല, നിന്റെ ടീമിനോട് പോലും സംസാരിക്കരുത്, ആ ഒരു സോണിൽ തന്നെ തുടരണം എന്നായിരുന്നു ഗീതുവിന്റെ നിർദ്ദേശം.’
തന്റെ കരിയറിലെ തന്നെ ഏറ്റവും വെല്ലുവിളി നിറഞ്ഞ ചിത്രങ്ങളിലൊന്നാണ് ‘ടോക്സിക്’ എന്ന് കിയാര പറയുന്നു. ചിത്രം ഒരേസമയം ഇംഗ്ലീഷിലും കന്നഡയിലുമാണ് ചിത്രീകരിക്കുന്നത്. ഓരോ സീനും ആദ്യം ഇംഗ്ലീഷിൽ എടുത്ത് പെർഫെക്റ്റ് ആയതിന് ശേഷമാണ് കന്നഡയിൽ ചിത്രീകരിച്ചിരുന്നത്. കന്നഡ തനിക്ക് പരിചിതമല്ലാത്ത ഭാഷയായതിനാൽ തലേദിവസം രാത്രി മുഴുവൻ ഇരുന്നാണ് ഡയലോഗുകൾ മനഃപാഠമാക്കിയിരുന്നതെന്നും കിയാര പറഞ്ഞു.
ബോളിവുഡിലോ തെലുങ്കിലോ വർക്ക് ചെയ്യുന്നത് പോലെ തന്നെയാണ് കന്നഡ സിനിമാ മേഖലയിലും അനുഭവപ്പെട്ടതെന്നും, ചെറിയ സാംസ്കാരിക വ്യത്യാസങ്ങൾ ഉണ്ടെങ്കിലും നമ്മളെല്ലാം ഒടുവിൽ ഇന്ത്യക്കാരായതിനാൽ ജോലി ചെയ്യുന്ന രീതികളിൽ വലിയ സമാനതകൾ ഉണ്ടെന്നും താരം കൂട്ടിച്ചേർത്തു.
ഗീതു മോഹൻദാസ് സംവിധാനം ചെയ്യുന്ന ‘ടോക്സിക്’ എന്ന ചിത്രത്തിൽ യഷ്, കിയാര അദ്വാനി എന്നിവരെ കൂടാതെ നയൻതാര, ഹുമ ഖുറേഷി, രുക്മിണി വസന്ത്, താര സുതരിയ എന്നിവരടങ്ങുന്ന വലിയൊരു താരനിര അണിനിരക്കുന്നുണ്ട്. ചിത്രം കന്നഡ, ഇംഗ്ലീഷ് കൂടാതെ ഹിന്ദി ഉൾപ്പെടെയുള്ള പ്രധാന ഭാഷകളിലും റിലീസ് ചെയ്യും. സിനിമയുടെ പുതിയ റിലീസ് തീയതി അണിയറപ്രവർത്തകർ പിന്നീട് പ്രഖ്യാപിക്കും.
