ബംഗളൂരു നഗരത്തിൽ നാൾക്കുനാൾ വർദ്ധിച്ചുവരുന്ന വീട്ടുവാടകയെക്കുറിച്ചുള്ള ചർച്ചകൾക്കിടയിൽ, സോഷ്യൽ മീഡിയയിൽ പുതിയൊരു വീഡിയോ തരംഗമാകുന്നു. പ്രതിമാസം 60,000 രൂപ വാടക നൽകുന്ന തന്റെ വീടിന്റെ മനോഹരമായ കാഴ്ച പങ്കുവെച്ചുകൊണ്ട് കരിഷ്മ എന്ന യുവതി പോസ്റ്റ് ചെയ്ത ഇൻസ്റ്റാഗ്രാം വീഡിയോയാണ് ഇപ്പോൾ ഇന്റർനെറ്റിൽ ചർച്ചയായി മാറിയിരിക്കുന്നത്.
താൻ താമസിക്കുന്ന വീടിന്റെ പ്രതിമാസ വാടക 60,000 രൂപയാണെന്ന് മുമ്പൊരു വീഡിയോയിൽ കരിഷ്മ വ്യക്തമാക്കിയിരുന്നു. ഇതിന് പിന്നാലെയാണ് ഇത്രയും തുക നൽകുന്നതിന് ഈ വീടിന്റെ കാഴ്ചയും അന്തരീക്ഷവും അർഹമാണോ എന്ന് ജനങ്ങളോട് ചോദിച്ചുകൊണ്ട് യുവതി വീടിന്റെ മുറിയിൽ നിന്നുള്ള മനോഹരമായ ദൃശ്യങ്ങൾ വീഡിയോയിലൂടെ പുറത്തുവിട്ടത്.
വിശാലവും തുറസ്സായതുമായ നഗരക്കാഴ്ചയാണ് വീഡിയോയിൽ കാണാൻ സാധിക്കുന്നത്. എന്നാൽ, ഈ തുക അമിതമാണോ അതോ ന്യായമാണോ എന്നതിൽ സോഷ്യൽ മീഡിയ ഉപയോക്താക്കൾക്കിടയിൽ അഭിപ്രായവ്യത്യാസം രൂക്ഷമാണ്.
വീഡിയോ വൈറലായതോടെ സമ്മിശ്ര പ്രതികരണങ്ങളാണ് ഉയർന്നുവരുന്നത്. “ഇത്രയും ശാന്തവും മനോഹരവുമായ കാഴ്ചയാണെങ്കിൽ ഒരു ലക്ഷം രൂപ വരെ വാടക നൽകാൻ ഞാൻ തയ്യാറാണ്,” എന്ന് ഒരു ഉപയോക്താവ് കുറിച്ചു. “വളരെ മനോഹരമായ കാഴ്ച,” എന്ന് മറ്റൊരാളും അഭിപ്രായപ്പെട്ടു.
അനാവശ്യമായി ഉയർന്ന തുക വാടകയായി നൽകുന്നത് നഗരത്തിലെ വാടക നിരക്ക് ഇനിയും വർദ്ധിപ്പിക്കാൻ മാത്രമേ ഉപകരിക്കൂ എന്നാണ് മറ്റു ചിലരുടെ വാദം. ബംഗളൂരുവിൽ ഐടി രംഗത്തെ ജീവനക്കാരുടെയും മറ്റും കടന്നുവരവോടെ താമസച്ചെലവ് കുത്തനെ ഉയർന്നതിനെച്ചൊല്ലി നിരന്തരം ചർച്ചകൾ നടക്കാറുണ്ട്. അതിനിടയിലാണ് പുതിയ വീഡിയോയും ജനശ്രദ്ധ നേടുന്നത്.
