ഫാമിലി കോടതി കെട്ടിടത്തിന്റെ മുകളിൽ നിന്ന് വീണ് സ്ത്രീക്ക് പരിക്ക്. ഡെറാഡൂണിലാണ് സംഭവം. ഇതിന്റെ സിസിടിവി ദൃശ്യങ്ങൾ സമൂഹമാധ്യമങ്ങളിൽ വൈറലായി. കോടതി സമയത്ത് ഒരു സ്ത്രീ പെട്ടെന്ന് കെടിടത്തിലേക്ക് കടന്നുവരികയും റെയിലിംഗിൽ നിന്ന് ചാടാൻ ശ്രമിക്കുകയും ചെയ്തു. ഇവരെ തടയാൻ ശ്രമിച്ചുകൊണ്ട് ഒരു വനിതാ പൊലീസ് ഉദ്യോഗസ്ഥയും പിന്നാലെ ഓടിയെത്തി. എന്നാൽ അതിനു മുൻപ് തന്നെ യുവതി താഴേക്ക് ചാടുന്നത് ദൃശ്യങ്ങളിൽ കാണാം.
സംഭവം അറിഞ്ഞ് നിരവധി പേർ റെയിലിംഗിന് അടുത്തേക്ക് ഓടിയെത്തുകയും പരുിക്കേറ്റ സ്ത്രീയുടെ അടുത്തേക്ക് ഓടി എത്തുകയും ചെയ്തു. സ്ത്രീ ആത്മഹത്യ ചെയ്യാൻ ശ്രമിച്ചതാണെന്നാണ് കോടതിയിലുണ്ടായിരുന്നവർ പറയുന്നത്. എന്നാൽ ഇവർ മനപ്പൂർവം ചാടിയതാണോ അതോ അബദ്ധത്തിൽ വീണതാണോ എന്ന് പൊലിസ് ഇതുവരെ ഔദ്യോഗികമായി സ്ഥിരീകരിച്ചിട്ടില്ല. സംഭവത്തെക്കുറിച്ച് സമഗ്രമായ അന്വേഷണം നടന്നു വരികയാണെന്ന് സിറ്റി സൂപ്രണ്ട് ഓഫ് പൊലിസ് ശേഖർ സുയാൽ വ്യക്തമാക്കി.
കുറച്ചുകാലമായി ഈ സ്ത്രീ കുടുംബവഴക്കിനെ തുടർന്ന് ബുദ്ധിമുട്ടിലായിരുന്നുവെന്ന് പൊലീസ് പറയുന്നു. 2019 ഒക്ടോബർ 8-നാണ് ഇവർ ഹരിയാന സ്വദേശിയെ വിവാഹം കഴിച്ചത്. തുടർന്ന് ഭർത്താവുമായി യോജിച്ച് പോകാൻ കഴിയാതെ വന്നതോടെ വിവാഹ മോചനത്തിനു ശ്രമിച്ചു. അതോടെ ഭർത്താവിൽ നിന്ന് പ്രതിമാസ ജീവനാംശം ആവശ്യപ്പെട്ട് ഇവർ ഫാമിലി കോടതിയെ സമീപിക്കുകയായിരുന്നു. കോടതി പ്രതിമാസം 5,000 രൂപ ജീവനാംശം അനുവദിക്കുകയും ചെയ്തിരുന്നു.
48 മാസത്തെ കുടിശികയായി 2.40 ലക്ഷം രൂപ ആവശ്യപ്പെടുകയും, തുക ബാങ്ക് അക്കൗണ്ടിൽ കൃത്യമായി നിക്ഷേപിക്കണമെന്ന് അഭ്യർഥിക്കുകയും ചെയ്തിരുന്നു. അിനിടയിലാണ് യുവതി കോടതി കെട്ടിടത്തിൽ നിന്നും ചാടിയത്.
