ഡൽഹി കണാട്ട് പ്ലേസിൽ നടന്ന ‘കോക്രോച്ച് ജന്ത പാർട്ടി’ പ്രതിഷേധത്തിനിടയിൽ രസകരമായ സംഭവങ്ങൾ. പ്രതിഷേധക്കാരെ പിന്തുടരുന്നതിനിടയിൽ പൊലീസ് ഉദ്യോഗസ്ഥന് തടവുകാരനായ ഒരാളുടെ മേലുള്ള നിയന്ത്രണം അല്പനേരത്തേക്ക് നഷ്ടമായി. ഈ അവസരം മുതലെടുത്ത് ആ വ്യക്തി പൊലീസിന്‍റെ പിടിയിൽ നിന്ന് ഓടിരക്ഷപ്പെടുന്നതിന്‍റെ ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്.
ഞായറാഴ്ച നടന്ന പ്രതിഷേധ പ്രകടനത്തിനിടയിലാണ് സംഭവം. ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടുകൊണ്ടായിരുന്നു സിജെപി പ്രതിഷേധം സംഘടിപ്പിച്ചത്. ഇതിനിടയിൽ ഒരു പ്രക്ഷോഭകനെ കസ്റ്റഡിയിലെടുത്ത പൊലീസ് ഉദ്യോഗസ്ഥൻ, മറ്റ് പ്രതിഷേധക്കാരെ പിടികൂടാനായി ഓടുകയായിരുന്നു. എന്നാൽ മറ്റുളളവരുടെ പിറകെ പോയ സമയം ശ്രദ്ധ തിരിഞ്ഞതോടെ, ആദ്യം പിടിയിലായ ആൾ പിടിവിട്ട് ഓടിരക്ഷപ്പെടുകയായിരുന്നു.
ദൃശ്യങ്ങൾ വളരെ പെട്ടെന്നാണ് സമൂഹമാധ്യമങ്ങളിൽ ചർച്ചയായത്. ഒട്ടേറെ ആളുകൾ ഈ സംഭവത്തെ മീമുകളാക്കി മാറ്റുകയും ചെയ്തു. ഡൽഹിയിൽ പ്രതിഷേധങ്ങൾ ശക്തമായ സാഹചര്യത്തിൽ വലിയ സുരക്ഷാ സന്നാഹങ്ങളാണ് പൊലീസും അർധസൈനിക വിഭാഗങ്ങളും ചേർന്ന് ഒരുക്കിയിരുന്നത്.
