പശ്ചിമ ബംഗാളിൽ റെയിൽവേ പാളം മുറിച്ചുകടക്കുന്നതിനിടയിൽ ആനക്കൂട്ടത്തെ രക്ഷിക്കാൻ സമയബന്ധിതമായി ഇടപെട്ട് വനപാലകൻ. വരാനിരുന്ന ട്രെയിനിന് മുന്നിൽ ചുവന്ന തുണി വീശി നിർത്താൻ ആവശ്യപ്പെട്ട വനപാലകന്‍റെ സമയോചിതമായ ഇടപെടൽ ഒരു വലിയ ദുരന്തമാണ് ഒഴിവാക്കിയത്. ഐഎഫ്എസ് ഉദ്യോഗസ്ഥനായ പർവീൺ കാസ്വാൻ ഈ സംഭവത്തിന്‍റെ വീഡിയോ എക്സിൽ പങ്കുവെച്ചിട്ടുണ്ട്.
പശ്ചിമ ബംഗാളിലെ ബാഗ്ഡോഗ്ര-നക്സൽബാരി റൂട്ടിലൂടെ സിക്കിം മഹാനന്ദ എക്സ്പ്രസ് കടന്നുപോകുന്നതിനിടയിലാണ് സംഭവം. റെയിൽവേ പാളത്തിലൂടെ ഒരു ആനക്കൂട്ടം കടന്നുപോകുന്നത് കണ്ട് വനപാലകനായ ആകാശ് കെർകെട്ട ഉടൻ തന്നെ പാളത്തിന് സമീപത്തേക്ക് ഓടിയെത്തുകയും ട്രെയിൻ ലോക്കോ പൈലറ്റിന് മുന്നറിയിപ്പ് നൽകാനായി ചുവന്ന തുണി ശക്തമായി വീശുകയുമായിരുന്നു.
വനപാലകൻ നൽകിയ മുന്നറിയിപ്പ് ശ്രദ്ധയിൽപ്പെട്ട ലോക്കോ പൈലറ്റ് പെട്ടെന്ന് തന്നെ ട്രെയിൻ വേഗത കുറച്ച് നിർത്തുകയായിരുന്നു. വനപാലകന്‍റെയും ട്രെയിൻ ജീവനക്കാരുടെയും കൃത്യസമയത്തുള്ള ഇടപെടൽ മൂലം ആനക്കൂട്ടത്തിന് യാതൊരു പരുക്കുമില്ലാതെ പാളം സുരക്ഷിതമായി മുറിച്ചുകടക്കാൻ സാധിച്ചു.
“യഥാർഥ ജീവിതത്തിൽ നായകന്മാർ ഇങ്ങനെയാണ് ഇരിക്കുന്നത്” എന്ന് കുറിച്ച് കൊണ്ടാണ് പർവീൺ കാസ്വാൻ ഈ ദൃശ്യങ്ങൾ സമൂഹമാധ്യമത്തിൽ പങ്കുവെച്ചത്. കുർസിയോങ് ഡിവിഷനിലെ വനപാലകനായ ആകാശ് കെർകെട്ടയുടെ ജാഗ്രതയെയും ജീവനക്കാരുടെ സമയബന്ധിതമായ ഇടപെടലിനെയും പ്രശംസിച്ച് നിരവധിപ്പേരാണ് രംഗത്തെത്തിയത്. കാട്ടാനകൾ പതിവായി സഞ്ചരിക്കുന്ന വനമേഖലകളിലെ റെയിൽവേ ട്രാക്കുകളിൽ ഇത്തരം അപകടങ്ങൾ ഒഴിവാക്കാൻ വനവകുപ്പും റെയിൽവേയും തമ്മിലുള്ള ഏകോപനം എത്രത്തോളം പ്രധാനമാണെന്ന് ഈ സംഭവം ഓർമിപ്പിക്കുന്നു.
