പത്തനംതിട്ട: നേപ്പാളില്‍ കുടുങ്ങിയ മലയാളി പര്‍വതാരോഹക സീന സാറ മജ്നു സുരക്ഷിതയെന്ന് ഭർത്താവ് മജ്നു എം. രാജന്‍. നേപ്പാളില്‍ നിന്നും ഫോണില്‍ അറിയിച്ചതാണെന്നും എന്നാല്‍, തിരികെ ഫോണില്‍ ബന്ധപ്പെടാന്‍ സാധിക്കില്ലെന്നും മജ്നു വ്യക്തമാക്കി.
എംബസി ഉദ്യോഗസ്ഥനാണ് വിളിക്കുന്നതെന്നാണ് പറഞ്ഞത്. സീന സുരക്ഷിതയാണെന്ന് പറഞ്ഞു. നെറ്റ്‌വര്‍ക്ക് ഇല്ല. കിട്ടിയാല്‍ തിരികെ വിളിക്കാമെന്നാണ് പറഞ്ഞത്. ബേസ് ക്യാമ്പില്‍ എത്തിക്കാണുമെന്നാണ് വിവരം. ഇറങ്ങുന്ന വഴിക്കാണ് അപകടം ഉണ്ടായതെന്നും മജ്നു പറഞ്ഞു.
നേപ്പാളിലെ ലൊബൂച്ചെ പർവതത്തിൽ നിിന്നും താഴേക്ക് ഇറങ്ങുന്നതിനിടെയാണ് ഇവർ വീണത്. വീഴ്ചയിൽ കൈക്ക് പരിക്കേൽക്കുകയും കൈ അനക്കാൻ കഴിയാത്ത അവസ്ഥയിലാവുകയും ചെയ്തു. ഒപ്പമുണ്ടായിരുന്നയാൾ താഴേക്ക് പോയെന്നും കാണാനില്ലെന്നും സീന സഹായം അഭ്യർഥിച്ച് സോഷ്യൽ മീഡിയയിൽ ഒരു വീഡിയോ പങ്കുവച്ചിരുന്നു.
