കൊച്ചി: ആലുവ വെള്ളത്തൂവലിലെ റിസോർട്ടിൽ നടന്ന ഹാലോവീൻ പാർട്ടിക്കിടെ പ്രായപൂർത്തിയാകാത്ത പെൺകുട്ടി ലൈംഗികാതിക്രമത്തിന് ഇരയായ സംഭവത്തിൽ അന്വേഷണം കൂടുതൽ പേരിലേക്ക് വ്യാപിപ്പിച്ച് പൊലീസ്. പാർട്ടി സംഘടിപ്പിക്കുന്നതിൽ പങ്കുവഹിച്ച 24കാരിയെ പൊലീസ് ഉടൻ ചോദ്യം ചെയ്യും. പെൺകുട്ടി പീഡനത്തിനിരയായ വിവരം യുവതിക്ക് നേരത്തേ അറിയാമായിരുന്നോ എന്നതടക്കമുള്ള കാര്യങ്ങളാണ് അന്വേഷിക്കുന്നത്.
എറണാകുളം സ്വദേശിനിയായ യുവതി കേസിൽ റിമാൻഡിലുള്ള പ്രതി അലക്സിന്റെ സുഹൃത്താണ്. പാർട്ടിയിൽ മദ്യത്തിന് പുറമെ മറ്റ് ലഹരിവസ്തുക്കളും ഉപയോഗിച്ചിരുന്നോ എന്ന കാര്യവും പൊലീസ് പരിശോധിക്കുന്നുണ്ട്. ആഘോഷത്തിൽ പങ്കെടുത്ത എല്ലാവരുടെയും മൊഴിയെടുക്കാനാണ് അന്വേഷണ സംഘത്തിന്റെ തീരുമാനം.
30ലേറെ പേർ പങ്കെടുത്ത പാർട്ടിയിലെ പലരുടെയും മൊബൈൽ ഫോണുകൾ നിലവിൽ സ്വിച്ച് ഓഫ് ചെയ്ത നിലയിലാണ്. ഇവരെ കണ്ടെത്തുന്നതിനായി പൊലീസ് വീടുകളിലെത്തി മൊഴി രേഖപ്പെടുത്തും. അതേസമയം, പ്രതി അലക്സിനെ കസ്റ്റഡിയിൽ വാങ്ങി വിശദമായി ചോദ്യം ചെയ്യുന്നതിനായി പൊലീസ് ഇന്ന് കോടതിയിൽ അപേക്ഷ സമർപ്പിക്കും.
പൊലീസിനെ അറിയിക്കാതെയായിരുന്നു റിസോർട്ടിൽ പാർട്ടി സംഘടിപ്പിച്ചത്. ഇതുമായി ബന്ധപ്പെട്ട് റിസോർട്ട് അധികൃതരെയും ജീവനക്കാരെയും നേരത്തേ ചോദ്യം ചെയ്തിരുന്നു. സംഭവത്തിൽ പൊലീസിന് പുറമെ എക്സൈസ് വകുപ്പും അന്വേഷണം നടത്തുന്നുണ്ട്.
ഒക്ടോബർ 31 രാത്രിയിലായിരുന്നു റിസോർട്ടിൽ ഹാലോവീൻ ആഘോഷം നടന്നത്. പാർട്ടിയിൽ പങ്കെടുത്ത പെൺകുട്ടിയുടെ പിതാവ് മുൻകൂട്ടി അറിയിക്കാതെ റിസോർട്ടിലെത്തിയതോടെയാണ് സംഭവം പുറത്തറിയുന്നത്. പാർട്ടിയിൽ ലഹരിവസ്തുക്കൾ ഉപയോഗിക്കുന്നതായി സംശയം തോന്നിയതിനെ തുടർന്ന് ഇദ്ദേഹം പീഡനത്തിനിരയായ പെൺകുട്ടിയുടെ വീട്ടുകാരെ വിവരം അറിയിക്കുകയായിരുന്നു. തുടർന്നാണ് സംഭവം പുറത്തുവരികയും പൊലീസ് അന്വേഷണം ആരംഭിക്കുകയും ചെയ്തത്.
