തൃക്കരിപ്പൂർ: വെള്ളാപ്പ് തീരദേശ പാതയിൽ സ്വകാര്യ ബസിടിച്ച് ഒടിഞ്ഞ വൈദ്യുത തൂൺ മറ്റൊരു ബസിന് മുകളിൽ വീണു. തീരദേശ പാതയിലെ മെട്ടമ്മൽ കാവില്യാട്ട് ബസ് സ്റ്റോപ്പിനടുത്ത് ഇന്ന് രാവിലെ എട്ടോടെയാണ് അപകടം.
പടന്ന ഓരിമുക്ക് വഴി പയ്യന്നൂരിലേക്ക് പോകുകയായിരുന്ന സഹൽ എന്ന സ്വകാര്യ ബസ് കാവില്യാട്ട് റോഡരികിലെ വൈദ്യുത തൂണിലിടിക്കുകയും ഹൈടെൻഷൻ ലൈൻ ഉൾപ്പെടെ കടന്നുപോകുന്ന തൂൺ മൂന്നായി ഒടിഞ്ഞു അതുവഴി ചെറുവത്തൂരിലേക്ക് പോകുകയായിരുന്ന നന്ദലാല ബസിന് മുകളിൽ പതിക്കുകയുമായിരുന്നു. ഭാഗ്യം കൊണ്ടാണ് വലിയൊരു ദുരന്തം ഒഴിവായത്.
ഇന്നലെ രാത്രി ആയിറ്റി ഫീഡറിലേക്ക് ഇളമ്പച്ചി സബ് സ്റ്റേഷനിൽ നിന്നും വൈദ്യുതി നൽകുന്ന ഹൈടെൻഷൻ ലൈൻ തകരാറിലായതിനാൽ ഹൈടെൻഷൻ ലൈനിൽ വൈദ്യുതി ഉണ്ടായിരുന്നില്ല. ഇതാണ് വലിയ ദുരന്തം ഒഴിവാകാൻ കാരണമായത്.
അപകടം മൂലം മൂന്ന് മണിക്കൂറോളം തീരദേശ പാതയിൽ വാഹനഗതാഗതം നിലച്ചു. 11 ഓടെ പടന്ന, തൃക്കരിപ്പൂർ കെഎസ്ഇബി ഓഫീസുകളിലെ ജീവനക്കാരും കരാർ തൊഴിലാളികളും ചേർന്ന് പുതിയ തൂണിട്ടു വൈദ്യുത ബന്ധം പുനഃസ്ഥാപിച്ചു.