കാസര്ഗോഡ്: സിപിഎം പ്രാദേശികനേതാവ് കഴിഞ്ഞ മൂന്നുപതിറ്റാണ്ടായി തന്നെ ലൈംഗികമായി പീഡിപ്പിക്കുന്നെന്ന പരാതിയുമായി വീട്ടമ്മ .എന്മകജെ പെര്ളയിലെ എസ്.സുധാകരക്കെതിരേയാണു ഗുരുതര ആരോപണങ്ങളുമായി വീട്ടമ്മ രംഗത്തെത്തിയത്.
സംസ്ഥാന പോലീസ് മേധാവിക്ക് തെളിവുകള് സഹിതം യുവതി പരാതി നല്കി. എന്മകജെ പഞ്ചായത്തിലെ മൂന്നാംവാര്ഡായ മല്ലെമൂലയിലെനിന്നുള്ള സിപിഎം മെംബറാണ് സുധാകര. ഒരു കൊലക്കേസില് ജീവപര്യന്തം തടവിനും ശിക്ഷിക്കപ്പെട്ടിരുന്നു. എയ്ഡഡ് പ്രൈമറി സ്കൂള് അധ്യാപകന്കൂടിയായ സുധാകര അടുത്തവര്ഷം സര്വീസില്നിന്നു വിരമിക്കാനിരിക്കുകയാണ്.
1995 മുതലാണ് സുധാകര തന്നെ പീഡിപ്പിക്കാന് തുടങ്ങിയതെന്ന് വീട്ടമ്മ ആരോപിച്ചു. അപ്പോള് അദ്ദേഹത്തിന് 24 വയസായിരുന്നു. ‘തുടക്കത്തില്, എന്നെ വിവാഹം കഴിക്കുമെന്നു വാഗ്ദാനം ചെയ്ത് അയാള് എന്നെ ഉപയോഗിച്ചു. പിന്നീട്, അയാള് മറ്റൊരാളെ വിവാഹം കഴിച്ചു.
എന്റെ വിവാഹവും കഴിഞ്ഞിരുന്നു. പക്ഷേ എന്നെ അപമാനിക്കുമെന്നു ഭീഷണിപ്പെടുത്തി പീഡിപ്പിക്കുന്നതു തുടര്ന്നു. സ്വന്തം നഗ്നവീഡിയോകള് എന്റെ ഫോണിലേക്ക് അയച്ചു. ഭര്ത്താവിനെ ഉപേക്ഷിച്ച് തന്റെ പക്കലേക്ക് വരണമെന്നും അല്ലാത്തപക്ഷം ഭര്ത്താവിനെ ഉപദ്രവിക്കുമെന്നും പറഞ്ഞു. അയാള് പറഞ്ഞതുപോലെ ചെയ്യുമെന്ന് അറിയാവുന്നതുകൊണ്ടാണ് പരാതി നല്കിയത്. ’അവര് പറഞ്ഞു.
കൊലക്കേസില് സുധാകര ജയിലില് കഴിഞ്ഞ ആറുവര്ഷം മാത്രമാണ് താന് സമാധാനത്തോടെ ജീവിച്ചതെന്നും അവര് കൂട്ടിച്ചേര്ത്തു. കുട്ടികളെയും സഹപ്രവര്ത്തകരെയുമടക്കം നിരവധി പേരെ ഇയാള് ലൈംഗികചൂഷണത്തിനിരയാക്കിയിട്ടുണ്ടെന്ന് വീട്ടമ്മ ആരോപിച്ചു. സുധാകരയെ കാട്ടുകുക്കെ ലോക്കല് കമ്മിറ്റിയില്നിന്നു പുറത്താക്കിയതായി സിപിഎം കുമ്പള ഏരിയ സെക്രട്ടറി സി.എ.സുബൈര് പറഞ്ഞു.
