ബുലന്ദ്ഷഹർ (ഉത്തർപ്രദേശ്): ഇരതേടിയിറങ്ങിയ കൂറ്റൻ മുതല നഗരവാസികൾക്കു ഞെട്ടലായി. ഉത്തർപ്രദേശിലെ ബുലന്ദ്ഷഹറിലെ നരോറ ഘാട്ടിന് സമീപം ഇന്നലെ പട്ടാപ്പകലായിരുന്നു സംഭവം. പത്തടിയിലേറെ ഉയരമുള്ള കൂറ്റന്‍ മുതലയാണു നഗരത്തിലിറങ്ങിയത്.
നദിയിലേക്കു തിരികെ ഇറങ്ങാനായി ജനവാസമേഖലയിലെ ഇരുമ്പുവേലി മറികടക്കാന്‍ ശ്രമിക്കുന്ന മുതലയുടെ വീഡിയോ സാമൂഹിക മാധ്യമങ്ങളില്‍ പങ്കുവയ്ക്കപ്പെട്ടു.
നഗരത്തിലിറങ്ങിയ മുതലയെ വനംവകുപ്പ് അധികൃതർ നാട്ടുകാരുടെ സഹായത്തോടെ പിടികൂടുന്നതിനിടെയാണ് അത് രക്ഷപ്പെടാന്‍ ശ്രമം നടത്തിയത്. പിന്നീട് മുതലയുടെ മുഖം മറച്ച് പിന്‍കാലുകള്‍ കൂട്ടിക്കെട്ടിയശേഷം പ്രദേശത്തുനിന്നു കൊണ്ടുപോകുകയായിരുന്നു.
മുതലയെ പിന്നീട് പിഎൽജിസി കനാലിലേക്ക് തുറന്നു വിട്ടു. പ്രദേശത്തെ ശുദ്ധജല കനാലില്‍നിന്ന് ഇരതേടിയിറങ്ങിയ പെണ്‍ മുതലയാണിതെന്നു വനം വകുപ്പ് അറിയിച്ചു.
