ജൊഹന്നാസ്ബർഗ്: ദക്ഷിണാഫ്രിക്കൻ മുൻ നായകൻ ഫാഫ് ഡുപ്ലസി ടെസ്റ്റ് ക്രിക്കറ്റിൽ നിന്നും വിരമിച്ചു. ഏകദിനത്തിലും ട്വന്‍റി-20 യിലും കൂടുതൽ ശ്രദ്ധ ചെലുത്തുമെന്നും താരം അറിയിച്ചു.
36 വയസുകാരനായ ഡുപ്ലസി 69 ടെസ്റ്റിൽ ദക്ഷിണാഫ്രിക്കയായി പാഡണിഞ്ഞു. 10 സെഞ്ചുറികളും 21 അർധ സെഞ്ചുറികളും ഉൾപ്പടെ 4,163 റണ്‍സാണ് സമ്പാദ്യം. 2016-ൽ എ.ബി.ഡിവില്ലിയേഴ്സിന്‍റെ പിൻഗാമിയായി ടെസ്റ്റ് ടീം നായക സ്ഥാനം ഏറ്റെടുത്ത ഡുപ്ലസി 36 ടെസ്റ്റിൽ ടീമിനെ നയിക്കുകയും ചെയ്തു.
143 ഏകദിനങ്ങളിലും 50 ട്വന്‍റി-20 മത്സരങ്ങളിലും രാജ്യത്തിനായി വെറ്ററൻ താരം കളിച്ചിട്ടുണ്ട്. അടുത്ത വർഷം നടക്കുന്ന ട്വന്‍റി-20 ലോകകപ്പിൽ കളിക്കുകയാണ് ലക്ഷ്യമെന്ന് ഡുപ്ലസി പ്രഖ്യാപിച്ചിട്ടുണ്ട്.
