കൊച്ചി: അങ്കമാലിയില് അമിത വേഗതയിലെത്തിയ കാറിടിച്ച് ബികോം വിദ്യാര്ഥിനി ജാസ്ലിയ ജോണ്സന് മരിച്ച സംഭവത്തില് കാറോടിച്ച ഡോ. സിറിയക് പി. ജോര്ജിനായി ലുക്ക് ഔട്ട് നോട്ടീസ് പുറത്തിറക്കുമെന്ന് പോലീസ്.അപകടം നടന്ന് അഞ്ചു ദിവസം ആയിട്ടും സിറിയക് ഒളിവില് തന്നെ തുടരുകയാണ്. ഇന്നലെ അതിരമ്പുഴയിലെ സിറിയക്കിന്റെ വീട്ടില് പോലീസ് പരിശോധന നടത്തിയിരുന്നു. അതേസമയം, ഡോക്ടറെ പിടികൂടാത്തതില് പ്രതിഷേധം ശക്തമാകുകയാണ്.
കഴിഞ്ഞ ഫെബ്രുവരി 28നാണ് അപകടം നടന്നത്. ജാസ്ലിയയെ ഇടിച്ച് തെറിപ്പിച്ചതിന് ശേഷം വാഹനം നിര്ത്താതെ പോകുകയായിരുന്നു. അപകടത്തിന്റെ ദൃശ്യങ്ങള് പുറത്തുവന്നിരുന്നു. തുടര്ന്ന് നടത്തിയ അന്വേഷണത്തിലാണ് തുറവൂരില് നിന്ന് വാഹനം കണ്ടെത്തിയത്. കോട്ടയം അതിരമ്പുഴ സ്വദേശി ഡോ. സിറിയക് പി. ജോര്ജ് ആണ് വാഹനം ഓടിച്ചത്.
ചാലാക്കല് മെഡിക്കല് കോളജിലെ ഹൗസ് സര്ജന്സി വിദ്യാര്ഥിയാണ് ഇയാള്. അപകടം നടക്കുമ്പോള് കാറില് സുഹൃത്തും ഉണ്ടായിരുന്നു. മദ്യപിച്ചതിന് തെളിവുകള് ഇല്ലെന്നും ജാമ്യമില്ലാ വകുപ്പ് ചുമത്തിയെന്നും അങ്കമാലി എസ്എച്ച്ഒ പറഞ്ഞു.
എടവനക്കാട് സ്വദേശിയായ ജാസ്ലിയ അങ്കമാലി മോണിംഗ് സ്റ്റാര് കോളജിലെ രണ്ടാം വര്ഷ ബി.കോം വിദ്യാര്ഥിനിയായിരുന്നു. പഠനത്തോടൊപ്പം പാര്ട്ട് ടൈം ജോലി ചെയ്തിരുന്ന ജാസ്ലിയ, ഫെബ്രുവരി 28ന് ജോലി കഴിഞ്ഞ് മടങ്ങുന്നതിനിടെയാണ് അങ്കമാലി ടെല്ക് ജംഗ്ഷനില് വച്ച് അപകടത്തില്പ്പെട്ടത്.
അപകടത്തില് തലയ്ക്ക് ഗുരുതരമായി പരിക്കേറ്റിരുന്ന ജാസ് ലിയ ചികിത്സയിലിരിക്കെ കഴിഞ്ഞ ദിവസം മസ്തിഷ്ക മരണം സംഭവിക്കുകയായിരുന്നു. അവയവ ദാനത്തിലൂടെ നാല് പേര്ക്ക് പുതുജീവന് നല്കിയാണ് ജാസ്ലിയ യാത്രയാകുന്നത്.
