മുഡബിദ്രി: ഹെപ്റ്റാത്തലണില് സ്വര്ണം നേടിയ പാലക്കാടുകാരി കെ.എ. അനാമിക ഇനി പറക്കുക ചൈനയിലേക്ക്. ഹെപ്റ്റയില് മൂന്നാംദിനംതന്നെ മുന്നിലായിരുന്ന അനാമിക, അവസാന ഇനമായ 800 മീറ്ററില് മികച്ച വ്യത്യാസത്തില് ഒന്നാമതെത്തിയായിരുന്നു സ്വര്ണം സ്വന്തമാക്കിയത്.
5158 പോയിന്റാണ് അനാമികയ്ക്കുള്ളത്. എസ്ആര്എം സര്വകലാശാലയില് എംബിഎ ഒന്നാംവര്ഷ വിദ്യാര്ഥിയാണ്. പാലക്കാട് പെരിങ്ങോട്ടുകുറിശി കോട്ടായി സ്വദേശിയാണ് അനാമിക. കൊഴിഞ്ഞപറം അനീഷ്-സുമ ദമ്പതികളുടെ മകള്. പാലക്കാടുകാരനും സായിയിലെ മുന്കോച്ചുമായ അരുണ്ലാലാണ് പരിശീലകന്.
അരുണ്ലാല് മുഖേനയാണ് പാലക്കാട് മേഴ്സി കോളജിലെ പൂര്വവിദ്യാര്ഥിയായ അനാമിക എസ്ആര്എമ്മില് എത്തിയത്. 12-ാമത് ഏഷ്യന് ഇന്ഡോര് ചാമ്പ്യന്ഷിപ്പില് പെന്റാത്തലണില് മത്സരിക്കാനായി അനാമിക അടുത്ത മാസം ചൈനയിലേക്കു പറക്കും. ഫെബ്രുവരി ആറിന് ചൈനയിലെ ടിയാന്ജിനിലാണ് ഏഷ്യന് ഇന്ഡോര് ചാമ്പ്യന്ഷിപ്പ്. ഫെബ്രുവരി മൂന്നിനു യാത്രതിരിക്കും.
ഹെപ്റ്റയില് ഇന്ത്യയിലെ രണ്ടാം റാങ്കുകാരി എന്ന നിലയിലാണ് ഏഷ്യന് ഇന്ഡോറിലേക്കു ക്ഷണമെത്തിയത്. കഴിഞ്ഞ വര്ഷവും സ്വര്ണം നേടിയിരുന്നു. ഓപ്പണ് അത് ലറ്റിക്സിലും ഇന്റര് സ്റ്റേറ്റിലും അനാമികയ്ക്കായിരുന്നു സ്വര്ണം. 5629 ആണ് മികച്ച പ്രകടനം.
