കൊച്ചി: കളമശേരിയില്‍ ജോലി വാഗ്ദാനം നല്‍കി വിളിച്ചുവരുത്തി യുവതിയെ കൂട്ടബലാത്സംഗത്തിനിരയാക്കിയ സംഭവത്തില്‍ രണ്ടുപേര്‍ കൂടി പിടിയില്‍. കേസിലെ രണ്ടാം പ്രതിയും വയനാട് സ്വദേശിനിയുമായ ശരണ്യ എന്ന അമ്മു, ഇവരുടെ സുഹൃത്ത് മൂന്നാം പ്രതി സഞ്ജു എന്നിവരെയാണ് വയനാട്ടില്‍ നിന്ന് പൊലിസ് കസ്റ്റഡിയിലെടുത്തത്. ഇതോടെ കേസിലെ നാലു പ്രതികളും പിടിയിലായി.
സ്പാ നടത്തിപ്പുകാരനും ഒന്നാം പ്രതിയുമായ ആലപ്പുഴ കാര്‍ത്തികപ്പള്ളി ഇരിക്കാവ് എസ്.ആര്‍ നിവാസില്‍ ശ്രീരാജ്, നാലാം പ്രതി തൃക്കാക്കര തേവക്കല്‍ കുതിരപ്പറമ്പില്‍ ജിത്ത് മാര്‍ട്ടിന്‍ എന്നിവരെ കഴിഞ്ഞ ദിവസം പൊലിസ് അറസ്റ്റ് ചെയ്തിരുന്നു. ശരണ്യയാണ് തന്നെ കൂടുതല്‍ ഉപദ്രവിച്ചതെന്ന് യുവതി പൊലിസിന് മൊഴി നല്‍കിയിരുന്നു. പ്രതികള്‍ രണ്ടുപേരും വയനാട്ടിലേക്ക് കടന്നെന്ന രഹസ്യ വിവരത്തിന്‍റെ അടിസ്ഥാനത്തില്‍ അന്വേഷണ സംഘം വയനാട്ടിലെത്തി അറസ്റ്റ് ചെയ്തത്.
കൃത്യത്തില്‍ നാലിലധികം പേര്‍ ഉള്‍പ്പെട്ടിട്ടുണ്ടെന്ന് യുവതിയുടെ ഭര്‍ത്താവ് ഇന്നലെ വെളിപ്പെടുത്തിയിരുന്നു. കൂട്ടബലാത്സംഗത്തിന് ഇരയായ യുവതി ക്രൂരമായ പീഡനമാണ് നേരിട്ടതെന്ന് ഭര്‍ത്താവ് വെളിപ്പെടുത്തിയിരുന്നു. യുവതി ക്രിമിനല്‍ സംഘത്തിന്‍റെ പിടിയില്‍ നിന്ന് രക്ഷപ്പെട്ടത് കഴുത്തില്‍ ബിയര്‍ കുപ്പി പൊട്ടിച്ചുവച്ച് ആത്മഹത്യാ ഭീഷണി മുഴക്കിയാണ്. പ്രതികള്‍ പരിഭാന്തിയിലായ തക്കത്തിനാണ് രക്ഷപ്പെട്ടത്.
തടവില്‍ വച്ച് ദുരുപയോഗം ചെയ്യാനും മറ്റുള്ളവര്‍ക്ക് കാഴ്ചവയ്ക്കാനുമാണ് പ്രതികള്‍ പദ്ധതിയിട്ടിരുന്നത്. ശാരീരികമായും മാനസികമായും തകര്‍ന്ന വീട്ടമ്മ കളമശേരി മെഡിക്കല്‍ കോളജില്‍ ചികിത്സയില്‍ തുടരുകയാണ്. ഇവരുടെ ദേഹമാസകലം പരിക്കുകളുണ്ട്. താന്‍ വീട്ടിലെത്തുമ്പോള്‍ എഴുന്നേറ്റു നില്‍ക്കാന്‍ പോലും കഴിയാത്ത അവസ്ഥയിലായിരുന്നു ഭാര്യ. ആശുപത്രിയില്‍ ചികിത്സയില്‍ കഴിയുന്ന ഇവര്‍ ആരെയും തിരിച്ചറിയാത്ത അവസ്ഥയിലാണ്. തന്നെപ്പോലും തിരിച്ചറിയുന്നില്ല.
കഴിഞ്ഞ രണ്ടിനായിരുന്നു നടുക്കിയ സംഭവം. സ്പായില്‍ ജോലി ശരിയാക്കി നല്‍കാമെന്ന് വിശ്വസിപ്പിച്ച് പ്രതികള്‍ യുവതിയെ ഇടപ്പള്ളിയിലുള്ള സ്വകാര്യ ലോഡ്ജിലേക്ക് ഇന്റര്‍വ്യൂവിനായി വിളിച്ചു വരുത്തുകയായിരുന്നു. രാ വിലെ അഭിമുഖം നടത്തിയ ശേഷം ജോലി ലഭിച്ചതായി യുവതിയെ അറിയിച്ചു. തുടര്‍ന്ന് വൈകിട്ട് വീണ്ടും വിളിച്ചുവരുത്തി ഐസ്‌ക്രീമില്‍ ലഹരിമരുന്നും ബിയറും നല്‍കി മയക്കിയ ശേഷം ക്രൂരമായി കൂട്ടബലാത്സംഗത്തിന് ഇരയാക്കുകയായരുന്നു. പിറ്റേ ദിവസം രാവിലെ ബോധം വന്നപ്പോഴാണ് പീഡിപ്പിക്കപ്പെട്ട വിവരം യുവതി തിരിച്ചറിഞ്ഞത്.
