മട്ടന്നൂർ: കണ്ണൂർ രാജ്യാന്തര വിമാനത്താവള യാത്രക്കാരനിൽ നിന്ന് നാലു ലക്ഷം രൂപയുടെ വിദേശ കറൻസി പിടികൂടി. പാനൂർ സ്വദേശി മൂസയിൽ നിന്നാണ് കറൻസി പിടികൂടിയത്. ഇന്നലെ രാത്രി 8.45ന് ഗോ എയർ വിമാനത്തിൽ ദുബായിൽ പോകാൻ എത്തിയതായിരുന്നു മൂസ. കസ്റ്റംസും സിഐഎസ്എഫും ചേർന്നു നടത്തിയ പരിശോധനയിലാണ് മൂസയിൽ നിന്ന് കറൻസി കണ്ടെടുത്തത്. ഡോളർ, ദിർഹം, ദിനാർ തുടങ്ങിയവയാണ് പിടികൂടിയത്.
ഇന്നലെ രാത്രി കുവൈത്തിൽ നിന്ന് എത്തിയ ഗോ എയർ വിമാനയാത്രക്കാരനായ കാഞ്ഞങ്ങാട് സ്വദേശി മുഹമ്മദ് കുഞ്ഞിയിൽ നിന്ന് 2000 പായ്ക്കറ്റ് വിദേശ നിർമിത സിഗരറ്റ് കസ്റ്റംസ് ചെക്കിംഗ് പരിശോധനയിൽ പിടികൂടിയിരുന്നു. പരിശോധനയിൽ കസ്റ്റംസ് അസി. കമ്മീഷണർ മധുസൂദനൻ ഭട്ട്, സൂപ്രണ്ടുമാരായ പി.സി.ചാക്കോ, സന്തോഷ് കുമാർ, ജ്യോതി ലക്ഷ്മി, ഇൻസ്പെക്ടർമാരായ അശോക് കുമാർ, ജോയ് സെബാസ്റ്റ്യൻ, യുഗൽ കുമാർ സിംഗ്, ഹവിൽദാർമാരായ മുകേഷ്, പാർവതി എന്നിവരുടെ നേതൃത്വത്തിലാണ് പരിശോധന നടത്തിയത്.