വെസ്റ്റ് ഇൻഡീസിനെതിരേ ഏകദിനത്തിൽ ഏറ്റവും അധികം റണ്‍സ് നേടുന്ന ഇന്ത്യൻ ക്രിക്കറ്റ് താരമെന്ന നേട്ടം സച്ചിൻ തെണ്ടുൽക്കറെ മറികടന്ന് സ്വന്തമാക്കാൻ വിരാട് കോഹ്ലി. വിൻഡീസിനെതിരായ പരന്പരയിൽ 187 റണ്‍സ് കൂടി എടുത്താൽ ഇതിഹാസ താരമായ സച്ചിനെ മറികടക്കാൻ ഇന്ത്യൻ ക്യാപ്റ്റനു സാധിക്കും.
39 മത്സരങ്ങളിൽനിന്നായി 52.73 ശരാശരിയിൽ 1573 റണ്‍സ് ആണ് സച്ചിൻ വിൻഡീസിനെതിരേ നേടിയത്. നാല് സെഞ്ചുറിയും 11 അർധസെഞ്ചുറിയും ഉൾപ്പെടെയാണിത്.
ഞായറാഴ്ച ആരംഭിക്കുന്ന അഞ്ച് മത്സര ഏകദിന പരന്പരയിൽ നിലവിലെ ഫോം അനുസരിച്ചാണെങ്കിൽ കോഹ്ലി ഇതു മറികടക്കും. വിൻഡീസിനെതിരേ 27 മത്സരങ്ങളിൽനിന്ന് 60.30 ശരാശരിയിൽ 1387 റണ്‍സാണ് കോഹ്ലിക്കുള്ളത്. നാല് സെഞ്ചുറിയും ഒന്പത് അർധസെഞ്ചുറിയും ഇതിൽ ഉൾപ്പെടും.
