ശുദ്ധ സസ്യാഹാരിയായ യുവതി ഓര്‍ഡര്‍ ചെയ്ത മഷ്‌റൂം പിസയില്‍ ഇറച്ചിക്കഷണങ്ങള്‍ വെച്ചു നല്‍കിയ റസ്റ്ററന്റിനെതിരേ പരാതി. ഉപഭോക്തൃ കോടതിയെ സമീപിച്ച യുവതി ഒരു കോടി രൂപയാണ് നഷ്ടപരിഹാരം ആവശ്യപ്പെട്ടിരിക്കുന്നത്.
ഗാസിയാബാദ് സ്വദേശിയായ ദീപാലി ത്യാഗി എന്ന യുവതിയാണ് മോശം അനുഭവത്തെതുടര്‍ന്ന് പരാതിയുമായി രംഗത്തെത്തിയത്. മതവിശ്വാസങ്ങളുടെയും കുടുംബ പാരമ്പര്യങ്ങളുടെയും അടിസ്ഥാനത്തില്‍ സ്വന്തം തീരുമാനത്തിലാണ് സസ്യാഹാരി ആയി തുടര്‍ന്നിരുന്നതെന്നും തനിക്ക് മാംസം അടങ്ങിയ പിസ കഴിക്കേണ്ടി വന്നെന്നും യുവതി പരാതിയില്‍ പറഞ്ഞു.
കഴിഞ്ഞ വര്‍ഷം മാര്‍ച്ച് 21നാണ് സംഭവം. ഗാസിയാബാദിലുള്ള പിസ ഔട്ട്‌ലറ്റില്‍ നിന്ന് ദീപാലി വെജിറ്റേറിയന്‍ പിസ്സയ്ക്ക് ഓര്‍ഡര്‍ നല്‍കിയത്.
പിസയുമായി ഡെലിവറി ബോയ് എത്താന്‍ താമസിച്ചതുമൂലം കൈയില്‍ കിട്ടിയതോടെ ദീപാലി അത് കഴിക്കുകയായിരുന്നു. കഴിച്ചശേഷമാണ് പിസയില്‍ മഷ്‌റൂമിന് പകരം ഇറച്ചി കഷണങ്ങളാണെന്ന് മനസിലായത്.
ദീപാലി ഉടന്‍ കസ്റ്റമര്‍ കെയറില്‍ വിളിച്ച് ശുദ്ധ വെജിറ്റേറിയനായ തന്റെ വീട്ടില്‍ മാംസം എത്തിച്ചതിന് പരാതിപ്പെട്ടു. പരാതി പറഞ്ഞതിന് ദിവസങ്ങള്‍ക്ക് ശേഷം റെസ്റ്റോറന്റിലെ മാനേജര്‍ ദീപാലിയെ വിളിച്ച് വീട്ടിലെ എല്ലാവര്‍ക്കും സൗജന്യമായി പിസ എത്തിച്ചുനല്‍കാമെന്ന് അറിയിച്ചു.
എന്നാല്‍ സംഭവിച്ചത് ചെറിയ പിഴവല്ലെന്നും തന്റെ മതവികാരങ്ങളെയും അനുഷ്ടാനങ്ങളെയുമാണ് ദ്രോഹിച്ചതെന്നും യുവതി പറഞ്ഞു.
ഇതിന് പരിഹാരമായി ദീര്‍ഘവും ചിലവേറിയതുമായ അനുഷ്ടാനങ്ങള്‍ നടത്തണമെന്നും യുവതി പറഞ്ഞു. ഇത് ലക്ഷങ്ങള്‍ ചിലവുവരുന്നതാണെന്ന് യുവതി പരാതിയില്‍ അറിയിച്ചു.
