കൊച്ചി: കെഎസ്ആര്ടിസി വനിതാ കണ്ടക്ടര്മാരുടെ ആര്ത്തവാവധി ഗൗരവമുള്ള വിഷയമെന്ന് ഹൈക്കോടതി. കെഎസ്ആര്ടിസിയില് ആര്ത്തവ അവധി നയം രൂപീകരിക്കാനാകുമോയെന്ന കാര്യത്തില് ജസ്റ്റീസ് എന്. നാഗരേഷ് സംസ്ഥാന സര്ക്കാരിന്റെ വിശദീകരണം തേടി.
കെഎസ്എസ്ആറില് ഇത്തരം വ്യവസ്ഥയില്ലെന്നും അവധി അനുവദിക്കാനാവില്ലെന്നുമായിരുന്നു സര്ക്കാര് അഭിഭാഷകന് കോടതിയെ അറിയിച്ചത്. എന്നാല് ശമ്പളത്തോടെയുള്ള ആര്ത്തവ അവധി നയം സംസ്ഥാനത്ത് പരിഗണിക്കാമോയെന്നതില് നിലപാടറിയിക്കണമെന്നാണ് കോടതി ആവശ്യപ്പെട്ടിരിക്കുന്നത്.
കെഎസ്ആര്ടിസി ഇരട്ട ഡ്യൂട്ടി സമ്പ്രദായം പിന്തുടരുന്നുണ്ടെന്നും കണ്ടക്ടര്മാര് പ്രതിദിനം 14 മുതല് 16 മണിക്കൂര് വരെ ജോലി ചെയ്യേണ്ടിവരുന്നുവെന്നും വനിതാ കണ്ടക്ടര്മാരായ ഹര്ജിക്കാരുടെ അഭിഭാഷകന് വാദിച്ചത്. അതിനാല് വനിതാ കണ്ടക്ടര്മാര്ക്ക് രണ്ട് ദിവസത്തെ ശമ്പളത്തോടുകൂടിയ ആര്ത്തവ അവധി അനുവദിക്കണമെന്നുമായിരുന്നു ആവശ്യം. ഇതിലാണ് സര്ക്കാരിന്റെ നിലപാട് കോടതി ആരാഞ്ഞത്.
