കൊച്ചി: വോട്ടിംഗ് യന്ത്രത്തിലെ ബാലറ്റിലും ഇവിഎം മെഷീനിലും തന്റെ പേര് അഞ്ജലി നായര് എന്നാക്കണമെന്ന ആവശ്യത്തെ അനുകൂലമായി പരിഗണിക്കണമെന്ന ഹൈക്കോടതിയുടെ നിര്ദ്ദേശം റിട്ടേണിംഗ് ഓഫീസര് അട്ടിമറിച്ചുവെന്ന് തൃപ്പൂണിത്തുറ മണ്ഡലം എന്ഡിഎ സ്ഥാനാര്ഥി അഞജിലി നായര്.രാഷ്ടീയ ഗൂഢലക്ഷ്യത്തോടെയാണ് റിട്ടേണിംഗ് ഓഫീസര് നിലപാട് സ്വീകരിച്ചതെന്നും ഇതിനെതിരെ ഇന്ന് വീണ്ടും ഹൈക്കോടതിയെ സമീപിക്കുമെന്നും അഞ്ജലി നായര് പറഞ്ഞു.
തൃപ്പൂണിത്തുറ നിയോജകമണ്ഡലത്തിലെ എന്ഡിഎ സ്ഥാനാര്ഥിയായ തന്നെ സിനിമാ മേഖലയിലും, പൊതുവായും അഞ്ജലി നായര് എന്നാണ് അറിയപ്പെടുന്നത്.തെരഞ്ഞെടുപ്പിന്റെ ഭാഗമായി പോസ്റ്ററടിച്ചതും, പ്രചാരണം നടത്തിയതും അങ്ങനെയാണെന്നും അതിനാല് ഇപ്പോള് ബാലറ്റില് ചേര്ത്തിരിക്കുന്ന അഞ്ജലി പി.വി. എന്ന തന്റെ പേര് അഞ്ജലി നായര് എന്നാക്കണമെന്നും ആവശ്യപ്പെട്ട് വരണാധികാരിക്ക് അപേക്ഷ നല്കിയെങ്കിലും അത് പരിഗണിച്ചില്ല.
തുടര്ന്ന് ഹൈക്കോടതിയെ സമീപിച്ചതിന്റെ അടിസ്ഥാനത്തില് ഹിയറിംഗ് നടത്തി അന്നുതന്നെ അനുഭാവപൂര്വം തീരുമാനം എടുക്കണമെന്നും റിട്ടേണിംഗ് ഓഫീസര്ക്ക് ഹൈക്കോടതി നിര്ദ്ദേശം നല്കിയിരുന്നു. എന്നാല് റിട്ടേണിംഗ് ഓഫീസര് മുമ്പാകെ ഹിയറിംഗ് നടത്തിയെങ്കിലും തന്റെ ആവശ്യം നിഷ്കരുണം തള്ളുകയായിരുന്നുവെന്ന് അഞ്ജലി നായര് പറഞ്ഞു.
