ആലപ്പുഴ: ധർമ വാഹകരെ സൃഷ്ടിച്ചെടുക്കുകയാണ് ഇന്നത്തെ തലമുറയുടെ ത്യാഗനിർഭരമായ കർത്തവ്യമെന്ന് സുന്നി മാനേജ്മെന്‍റ് അസോസിയേഷൻ സംസ്ഥാന വൈസ് പ്രസിഡന്‍റ് പി.കെ ബാദ്ഷാ സഖാഫി. രാജ്യത്തിന്‍റെ പൈതൃകത്തെയും മതദർശനങ്ങളെയും തിരസ്കരിച്ച് ആശങ്ക സൃഷ്ടിക്കുന്ന സാഹചര്യത്തിൽ ശരിക്കും മതനിഷ്ടയുളളവർ ധർമവും സഹിഷ്ണുതയും സ്വീകരിച്ചും സൂക്ഷിച്ചും പ്രവർത്തിക്കണമെന്നും അദ്ദേഹം പറഞ്ഞു.
ഹാശിമിയ്യയിൽ ജില്ല മുതഅല്ലിം സമ്മേളനത്തിൽ മുഖ്യ പ്രഭാഷണം നടത്തുകയായിരുന്നു അദ്ദേഹം. ജംഇയ്യത്തുൽ ഉലമാ ജില്ലാ ഉപാദ്ധ്യക്ഷൻ സയ്യിദ് വി.പി.എ തങ്ങൾ ദാരിമി ആട്ടിരി സമ്മേളനം ഉദ്ഘാടനം ചെയ്തു. എസ്എസ്എഫ് ആലപ്പുഴ ജില്ലാ പ്രസിഡന്‍റ് സിദ്ദീഖ് സഖാഫി അദ്ധ്യക്ഷം വഹിച്ചു.
മാതൃകാ വിദ്യാർഥി എന്ന വിഷയത്തിൽ ഈ തമീം സഖാഫിയും സമന്വയ വിദ്യാഭ്യാസം എന്ന വിഷയത്തിൽ എച്ച് ഷമീറലി സഖാഫിയും പ്രഭാഷണം നടത്തി. പിഎംഎസ്എ ആറ്റകോയാ തങ്ങൾ, എസ് അഷ്റഫ് സഖാഫി, എ.സജീർ സഖാവി, എസ്. നിസാമുദ്ദീൻ സഖാഫി എന്നിവർ പ്രസംഗിച്ചു.
