മലയാള സിനിമയിലെ യുവ അഭിനേത്രികളില്‍ ശ്രദ്ധേയയാണ് നിമിഷ സജയന്‍. തൊണ്ടി മുതലും ദൃക്‌സാക്ഷിയും എന്ന ചിത്രത്തിലൂടെയാണ് താരം അഭിനയ ജീവിതം ആരംഭിക്കുന്നത്.
ആദ്യ ചിത്രത്തിലെ അഭിനയം തന്നെ പ്രശംസ പിടിച്ചു പറ്റിയിരുന്നു. ഈ ചിത്രത്തിലെ അഭിനയത്തിനാണ് പുതുമുഖ നടിക്കുള്ള വനിതാ ഫിലിം അവാര്‍ഡ് താരത്തിന് ലഭിച്ചത്.
ആദ്യ സിനിമയിലെ അഭിനയത്തിന് തന്നെ അംഗീകാരം ലഭിച്ചതിനു ശേഷം മികച്ച നടിക്കുള്ള സംസ്ഥാന അവാര്‍ഡും ലഭിച്ചു. 2017 മുതലാണ് താരം സിനിമ അഭിനയ മേഖലയില്‍ സജീവമായത്.
മാസ്സ് കമ്മ്യൂണിക്കേഷനില്‍ ബിരുദം ചെയ്യുന്ന സമയത്താണ് കൊച്ചിയിലേക്ക് എത്തിയതും തൊണ്ടിമുതലും ദൃക്‌സാക്ഷിയും എന്ന ചിത്രത്തില്‍ അഭിനയിക്കാനുള്ള അവസരം കിട്ടിയതും.
ഒരു കുപ്രസിദ്ധ പയ്യന്‍, ചോല, മംഗല്യം തന്തുനാനേന, തുറമുഖം, സ്റ്റാന്‍ഡ് അപ്പ്, ബഹാര്‍, ജിന്ന്, ദ ഗ്രേറ്റ് ഇന്ത്യന്‍ കിച്ചണ്‍ എന്നിവയെല്ലാം താരം അഭിനയിച്ച സിനിമകള്‍ ആണ്. ഈയടുത്ത് റിലീസായ നായാട്ട്, വണ്‍ ചിത്രങ്ങളിലും ശ്രദ്ധേയമായ വേഷങ്ങള്‍ ചെയ്തു.
സോഷ്യല്‍ മീഡിയയിലും നിമിഷ സജീവമാണ്. മേക്കപ്പില്ലാതെ ആണ് താരം സിനിമകളില്‍ അഭിനയിക്കാറുള്ളത് എന്ന വാര്‍ത്ത വളരെയധികം ചര്‍ച്ചയായിരുന്നു.
ഇപ്പോള്‍ താരം തന്റെ നിറത്തെക്കുറിച്ച് പറഞ്ഞിരിക്കുന്ന വാക്കുകളാണ് വൈറലായിരിക്കുന്നത്. തന്റെ നിറത്തിലും ചര്‍മ്മത്തിലും താന്‍ കംഫര്‍ട്ട് ആണ് എന്നും ആരെന്തു പറഞ്ഞാലും എന്നെ ബാധിക്കാറില്ല എന്നും നെഗറ്റീവ് കമന്റുകള്‍ മൈന്‍ഡ് ചെയ്യാറില്ല എന്നുമാണ് താരം പറഞ്ഞത്.
നിമിഷയുടെ വാക്കുകള്‍ ഇങ്ങനെ…”അനാവശ്യ വിമര്‍ശനങ്ങള്‍ ഒന്നും മൈന്‍ഡ് ചെയ്യാറില്ല എന്നും അവര്‍ അവരുടെ തോന്നല്‍ പറയുന്നു ഞാന്‍ അത് കാര്യമായി എടുക്കണോ വേണ്ടയോ എന്നത് എന്റെ മാത്രം തീരുമാനം അല്ലേ” താരം ചോദിക്കുന്നു.
നേരിട്ട് ആരും ഒന്നും പറയാറില്ല. എന്തെങ്കിലും പറഞ്ഞാല്‍ നൈസായി മറുപടി കൊടുക്കാനും തനിക്കറിയാം എന്നും താരം പറയുന്നു.
