പത്തനംതിട്ട: പത്തനംതിട്ട എആര് ക്യാമ്പില് നിന്നുള്ള ആക്രി സാധനങ്ങള് ആരുമറിയാതെ എസ്ഐ തൂക്കി വിറ്റതായി ആക്ഷേപം. എആര് ക്യാമ്പിലെ എസ്ഐ ജയകുമാറിനെതിരേയാണ് പരാതി ഉയര്ന്നിരിക്കുന്നത്. കഴിഞ്ഞ ആഴ്ചയാണ് സംഭവം.
എആര് ക്യാമ്പിലുണ്ടായിരുന്ന ആക്രി സാധനങ്ങള് വാഹനത്തില് കയറ്റി വടശേരിക്കരയ്ക്കുസമീപം ചെങ്ങറ മുക്കിലുളള കടയില് എത്തിച്ചു വിറ്റ് പണം വാങ്ങുകയായിരുന്നു. ക്യാമ്പിലെ ആക്രി സാധനങ്ങള് വില്ക്കുന്നതിന് സര്ക്കാര് നടപടി ക്രമങ്ങളുണ്ട്. ടെന്ഡര് വിളിച്ചാണ് എന്തു സാധനവും വില്ക്കേണ്ടത്. ഇവിടെ ഒരു നടപടി ക്രമവും പാലിക്കാതെ എസ്ഐ സാധനങ്ങള് കൊണ്ടുപോയി വില്ക്കുകയായിരുന്നു.
ജയകുമാറിനോടു വിരോധമുള്ള ഒരു പോലീസുകാരനാണ് വില്പന വിവാദമാക്കിയതെന്നു പറയുന്നു. ഇയാള് ആക്രിക്കടയിലെ സിസി ടിവി ദൃശ്യങ്ങള് അടക്കം ശേഖരിച്ച് പരാതി നല്കുകയായിരുന്നു.
തെളിവു സഹിതം പരാതി വന്നതോടെ എസ്ഐ വെട്ടിലായി. ആക്രി വിറ്റു കിട്ടിയ പണം എസ്ഐ തിരികെ അടച്ചു തലയൂരാന് ശ്രമിച്ചെങ്കിലും ഇത് തടസപ്പെട്ടു. വിശദമായ റിപ്പോര്ട്ട് ക്യാമ്പ് കമാന്ഡന്റ് ജില്ലാ പോലീസ് മേധാവിക്കു സമര്പ്പിച്ചുവെന്നാണ് അറിയുന്നത്. എസഐക്കെതിരേ നടപടിയുണ്ടായേക്കും.
മദ്യപിച്ച് ബഹളമുണ്ടാക്കിയതിനും സഹപ്രവര്ത്തകനെ മര്ദിച്ചതിനുമടക്കം നിരവധി തവണ നടപടി നേരിട്ടിട്ടുള്ളയാളാണ് ജയകുമാര്.
