കാനഡയിലുള്ള ഒരു ഇന്ത്യൻ യുവതി അയച്ചുനൽകിയ തുക ഉപയോഗിച്ച് കൂട്ടുകാർക്ക് വൻ വിരുന്നൊരുക്കി ഒരു കൊച്ചുമിടുക്കൻ. തനിക്ക ലഭിച്ച തുക സ്വന്തമായി ഉപയോഗിക്കുന്നതിന് പകരം കൂട്ടുകാർക്കായി ഫ്രഞ്ച് ഫ്രൈസും ഗുലാബ് ജാമുനും പേസ്ട്രിയുമൊക്കെ നൽകി സദ്യയൊരുക്കിയ സൂരജ് കുമാർ എന്ന കൊച്ചുമിടുക്കനാണ് ഇപ്പോൾ സോഷ്യൽ മീഡിയയിൽ താരം.
സോഷ്യൽ മീഡിയയിൽ പാചക വീഡിയോകളിലൂടെ ശ്രദ്ധേയനായ സൂരജ്, കാനഡയിലുള്ള കേശ എന്ന യുവതി നൽകിയ പണം ഉപയോഗിച്ച് ഉണ്ടാക്കിയ ഭക്ഷണങ്ങളുടെ വീഡിയോ ഇൻസ്റ്റഗ്രാമിൽ പങ്കുവെക്കുകയായിരുന്നു. കിഴങ്ങുവർഗ്ഗങ്ങൾ അരിഞ്ഞ് ഫ്രഞ്ച് ഫ്രൈസ് തയ്യാറാക്കുന്നതും, കൂട്ടുകാർക്കായി മിരിൻഡ, കപ് കേക്കുകൾ, പാറ്റീസ്, ഗുലാബ് ജാമുൻ എന്നിവ വിതരണം ചെയ്യുന്നതും വീഡിയോയിൽ കാണാം.
“കാനഡയിലെ കേശ ദീദി നൽകിയതാണ് ഇത്” എന്ന അടിക്കുറിപ്പോടെ പങ്കുവെച്ച വീഡിയോ നിമിഷനേരം കൊണ്ടാണ് തരംഗമായത്. സ്വന്തമായി കിട്ടിയ സമ്മാനം കൂട്ടുകാർക്കായി പങ്കുവെച്ച സൂരജിന്റെ വിശാലമനസ്സിനെയും കുട്ടികൾക്ക് സഹായമെത്തിച്ച കേശയെയും അഭിനന്ദിച്ച് നിരവധി പേരാണ് രംഗത്തെത്തിയത്.
