വ്യായാമം ജീവിതത്തിന്റെ ഭാഗമാക്കുന്നവരാണ് നമ്മളിൽ പകുതി ആളുകളും. ജീവിത ശൈലീ രോഗങ്ങളിൽ നിന്ന് മുക്തരാക്കാൻ വ്യായാമം നമ്മെ സഹായിക്കും. എന്നാൽ ഓരോ ആളുകൾക്കും അവരുടെ ശരീര ഘടനയ്ക്ക് അനുസൃതമായ വ്യായാമം വേണം ചെയ്യാൻ. അല്ലാത്ത പക്ഷം ശരീരാവസ്ഥ മെച്ചപ്പെടുന്നതിനു പകരം മറ്റ് പല അസുഖങ്ങളേയും ക്ഷണിച്ചു വരുത്തേണ്ട അവസ്ഥ വരും.
കിഴക്കൻ ചൈനയിലെ ഷെജിയാംഗ് പ്രവിശ്യയിൽ താമസിക്കുന്ന 23- കാരിക്ക് സംഭവിച്ചതും അത്തരത്തിലൊരു അനുഭവമാണ്. അതാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. അവൾക്ക് വ്യായാമത്തോട് കടുത്ത അഡിക്ഷൻ ആയി. എല്ലാ ദിവസവും 70 മിനിട്ട് അവൾ വ്യായാമത്തിനായി നീക്കി വയ്ക്കുമായിരുന്നു. എന്നാൽ അമിതമായി അവൾ ചെയ്യുന്ന വർക്ക്ഔട്ടുകൾ ശരീരത്തിന് താങ്ങാവുന്നതിലും അപ്പുറമായിരുന്നു. പിന്നാലെ ഓരോ ആരോഗ്യപ്രശ്നങ്ങളും അവളെ അലട്ടാൻ തുടങ്ങി.
ആർത്തവ സമയത്തെ രക്തസ്രാവം കുറയുകയായിരുന്നു ആദ്യ സമയങ്ങളിൽ അവൾ നേരിട്ട പ്രശ്നം. പിന്നാലെ ഒന്നൊന്നായി ഓരോ ശാരീരിക ബുദ്ധിമുട്ടുകൾ ഉണ്ടാകാൻ തുടങ്ങി. ആർത്തവം പിന്നീട് വരാതെ ആവുകയും ചെയ്തതോടെ അവൾ ഡോക്ടറെ കൺസൾട്ട് ചെയ്തു. പരിശോധനയിൽ അവളുടെ ശരീരത്തിന്റെ ഹോർമോണുകൾ 50 വയസുകാരിയുടേത് പോലെ ആയെന്നാണ് ഡോക്ടർമാർ പറഞ്ഞത്. മാത്രമല്ല അമിത വ്യായാമം അവളുടെ വൃക്കകളും തകരാറിലാക്കിയെന്നും കണ്ടെത്തി. അതോടെ വ്യായാമം നിർത്താൻ ഡോക്ടർമാർ പറഞ്ഞു.
ശരീരഭാരം 60 നു മുകളിൽ എത്തിയപ്പോഴാണ് യുവതി വ്യായാമം ചെയ്യുന്നതിനായ് ജിമ്മിൽ ജോയിൻ ചെയ്തത്. ആദ്യ കുറച്ച് മാസങ്ങളെത്തിയപ്പോൾ ശരീര ഭാരം കുറയുന്നുണ്ടെന്ന് കണ്ടതോടെ വല്ലാത്ത ആവേശവും ആത്മവിശ്വാസവും അവൾക്ക് വന്നു. അങ്ങനെ വർക്ക്ഒട്ടുകളോട് ഭ്രാന്തമായ ഇഷ്ടം ഉണ്ടായി. വർക്ക്ഔട്ട് ചെയ്യുന്ന സമയവും കൂട്ടി. എന്നാൽ കടുത്ത ആരോഗ്യപ്രശ്നങ്ങൾ അവളെ അലട്ടിയതോടെ പൂർണമായി ജിമ്മിൽ പോകുന്നതും വ്യായാമം ചെയ്യുന്നതും കുറയ്ക്കണമെന്ന് ഡോക്ടർമാർ നിർദേശിച്ചു. ശരീരം പഴയതുപോലെയാക്കാൻ ചൈനീസ് പരമ്പരാഗത മരുന്നുകളാണ് നിർദേശിച്ചത്.
