പരവൂർ: ഇന്ത്യൻ റെയിൽവേയുടെ ഓൺലൈൻ പാസഞ്ചർ സേവനങ്ങൾ ഇനി മുതൽ “റെയിൽ വൺ’എന്ന ഏകീകൃത പ്ലാറ്റ്ഫോമിലേക്ക് മാറുന്നു. നിലവിലെ യുടിഎസ് ആപ്പ് മാർച്ച് ഒന്നുമുതൽ പ്രവർത്തനരഹിതമാകുമെന്ന് പാസഞ്ചർ മാർക്കറ്റിംഗ് ചീഫ് കൊമേഴ്സ്യൽ മാനേജരുടെ ഓഫീസ് അറിയിച്ചു.
യുടിഎസ് ആപ്പ് നിർത്തലാക്കുന്ന നടപടികൾ ഘട്ടംഘട്ടമായാണ് നടപ്പാക്കുന്നത്. സെന്റർ ഫോർ റെയിൽവേ ഇൻഫർമേഷൻ സിസ്റ്റത്തിനാണ് മാറ്റങ്ങൾ നടപ്പാക്കുന്നതിന്റെ ചുമതല. ഇതിന്റെ ഭാഗമായി സീസൺ ടിക്കറ്റ് ബുക്കിംഗ്, പുതുക്കൽ, പുതിയ രജിസ്ട്രേഷൻ എന്നിവ ഇതിനകം തന്നെ നിർത്തലാക്കി കഴിഞ്ഞു..
ആപ്പിന്റെ പുതിയ പതിപ്പ് ഡൗൺലോഡ് ചെയ്യുന്ന വർക്കോ അപ്ഡേറ്റ് ചെയ്യുന്നവർക്കോ ഇനി മുതൽ പ്ലാറ്റ്ഫോം ടിക്കറ്റുകൾ ബുക്ക് ചെയ്യാനോ ആർ-വാലറ്റ് റീചാർജ് ചെയ്യാനോ സാധിക്കില്ലെന്നും റെയിൽവേ അധികൃതർ അറിയിച്ചു.യുടിഎസ് ആപ്പിലെ ഉപയോക്താക്കളുടെ നിലവിലെ ആർ-വാലറ്റ് ബാലൻസ് സുരക്ഷിതമായിരി ക്കുമെന്ന് റെയിൽവേ അറിയിച്ചു.
ആപ്പ് നിർത്തലാക്കുന്നത് മൂലം വാലറ്റിലെ തുക നഷ്ടപ്പെടില്ല. യാത്രക്കാർക്ക് ഈ ബാലൻസ് പുതിയ റെയിൽ വൺ ആപ്പിൽ തുടർന്നും ഉപയോഗിക്കാം. റിസർവ്ഡ്, അൺറിസർവ്ഡ്, സീസൺ, പ്ലാറ്റ് ഫോം എന്നീ ടിക്കറ്റുകൾ ഇനി മുതൽ “റെയിൽ വൺ’ വഴി ബുക്ക് ചെയ്യാം.
യുപിഐ, ഡെബിറ്റ്/ ക്രെഡിറ്റ് കാർഡുകൾ, ആർ-വാലറ്റ്, നെറ്റ് ബാങ്കിംഗ് എന്നിവ വഴി സുരക്ഷിതമായി ഇടപാട് നടത്താം.ട്രെയിനുകളുടെ ലൈവ് സ്റ്റാറ്റസ്, സമയക്രമം, പ്ലാറ്റ്ഫോം വിവരങ്ങൾ, കോച്ച് പൊസിഷൻ എന്നിവ യാത്രക്കാർക്ക് വേഗത്തിൽ അറിയാൻ റെയിൽ വൺ ആപ്പിൽ സംവിധാനമുണ്ട്.പിഎൻആർ സ്റ്റാറ്റസ് പരിശോധിക്കാനും ടിക്കറ്റ് റദ്ദാക്കാനും റീഫണ്ട് വിവരങ്ങൾ നിരീക്ഷി ക്കാനും സൗകര്യമുണ്ട്.ഐആർസിടിസിയുടെ അംഗീകൃത വെണ്ടർമാരിൽനിന്ന് നേരിട്ട് സീറ്റിലേക്ക് ഭക്ഷണം ഓർഡർ ചെയ്യാനും സാധിക്കും.
