വയറിന്റെ മൂന്നിലൊന്നു ഭാഗം ഭക്ഷണത്തിനും മൂന്നിലൊന്നു വെള്ളത്തിനും ബാക്കി മൂന്നിലൊന്ന് ശ്വസനത്തിനുമായി മാറ്റിവയ്ക്കുകയെന്ന പ്രവാചകവചനമനുസരിച്ച് ‘മിതത്വം’ എന്നതാണ് നോമ്പുതുറയിലെ സുവര്ണനിയമം. മാനസിക സന്തോഷത്തോടും നന്ദിയോടും കൂടി നോമ്പ് തുറക്കുക.
ലഘുവായി തുടങ്ങാം
‘ഈന്തപ്പഴം’ കഴിച്ചുതുടങ്ങുന്നത്, ഉടനടി ഊര്ജം ലഭിക്കാന് ഏറ്റവും ഉചിതമാണ്. ലഘുവായി തുടങ്ങുക. അതായത്, ഉദരത്തിന് മിതമായ രീതിയില് പ്രവര്ത്തിച്ചു തുടങ്ങാവുന്ന ഭക്ഷണത്തില് തുടങ്ങുക. ദിവസം മുഴുവന് വിശ്രമത്തിലായിരുന്ന ദഹനവ്യവസ്ഥയിലേക്ക് കഠിനമായ ഭക്ഷണങ്ങള് പെട്ടെന്ന് എത്തുമ്പോള് വയറുവേദനയോ അസ്വസ്ഥതയോ ഉണ്ടായേക്കാം.
ഔഷധഗുണമുള്ള ഇലകളും മസാലകളും ചേര്ത്ത പച്ചക്കറി സൂപ്പുകള് ഇതിന് ഏറ്റവും അനുയോജ്യമാണ്. പകല് മുഴുവന് നീണ്ടുനിന്ന വ്രതത്തിനുശേഷം ശരീരത്തിന് ആവശ്യമായ വിറ്റാമിനുകളും ധാതുക്കളും (Vitamins and Minerals) ഉടനടി നല്കാന് ഇത്തരം സൂപ്പുകള്ക്ക് സാധിക്കും. ഇത് കോശങ്ങള്ക്ക് ഉന്മേഷം നല്ക്കുന്നു.
സൂപ്പുകളുടെ ഔഷധഗുണം
അതുപോലെ, ചൂടുള്ള ഒരു ബൗള് സൂപ്പ് കുടിക്കുന്നത് ആമാശയത്തിന്(Stomach) ആശ്വാസം നല്കുന്നു. പ്രധാന ഭക്ഷണത്തിനായി പരുവപ്പെടുത്തുന്നു. സൂപ്പുകളില് ചേര്ക്കുന്ന ഔഷധസസ്യങ്ങള്ക്ക് (Herbs) ഓരോന്നിനും ഓരോ പ്രത്യേക ഗുണങ്ങളുണ്ട്- റോസ്മേരി(Rosemary), തൈം (Thyme) ഇവ ദഹനത്തെ സഹായിക്കുകയും ശരീരത്തിന്റെ പ്രതിരോധശേഷി വര്ധിപ്പിക്കുകയും ചെയ്യുന്നു. ജീരകം (Cumin) ഗ്യാസ് സംബന്ധമായ പ്രശ്നങ്ങള് ഒഴിവാക്കാനും ഉദരത്തിന് കുളിര്മ നല്കാനും മികച്ചതാണ്. ഉലുവ (Fenugreek) രക്തത്തിലെ പഞ്ചസാരയുടെ അളവ് നിയന്ത്രിക്കാനും ദഹനം എളുപ്പമാക്കാനും ഏറെ സഹായിക്കുന്നു.
ആവിയിൽ പുഴുങ്ങിയ ഭക്ഷണം
ലഘുവായതും എന്നാല് പോഷകപ്രദവുമായ ഭക്ഷണം കഴിക്കുന്നത് നോമ്പ് തുറന്ന ശേഷമുള്ള തളര്ച്ചയും വയര് വീര്ക്കുന്ന അവസ്ഥയും (Bloating) ഒഴിവാക്കാന് സഹായിക്കും. അമിതമായി വറുത്തതും പൊരിച്ചതുമായ ഭക്ഷണങ്ങള്ക്കു പകരം, ബേക്ക് ചെയ്തതോ ഗ്രില് ചെയ്തതോ ആവിയില് പുഴുങ്ങിയതോ ആയ രീതികള് തെരഞ്ഞെടുക്കുന്നത്, ഉപ്പും എണ്ണയും കുറയ്ക്കാന് ഏറെ സഹായിക്കും. കൃത്രിമ മധുരത്തിനു പകരം പ്രകൃതിദത്തമായ പഴങ്ങള്
കഴിക്കുക.
(തുടരും)
