ചെങ്ങന്നൂർ: സിപിഎം നേതാവ് ജി. സുധാകരൻ ഉന്നയിക്കുന്ന രാഷ്ട്രീയ ക്രിമിനൽ പരാമർശങ്ങളിൽ മറുപടിയുമായി ബിജെപി ആലപ്പുഴ സൗത്ത് ജില്ലാ അധ്യക്ഷൻ സന്ദീപ് വാചസ്പതി. രാഷ്ട്രീയ ക്രിമിനലുകൾക്കെതിരേയാണ് തന്റെ പോരാട്ടമെന്ന് അവകാശപ്പെടുന്ന സുധാകരൻ, കൃഷ്ണപിള്ള സ്മാരകം തകർത്തതിനു പിന്നിൽ പ്രവർത്തിച്ചവർ ആരെന്ന് വെളിപ്പെടുത്തണമെന്ന് അദ്ദേഹം ആവശ്യപ്പെട്ടു.
ആലപ്പുഴയിൽ ജി. സുധാകരൻ അറിയാതെ ഒരില പോലും അനങ്ങാത്ത രാഷ്ട്രീയ സാഹചര്യമുള്ളപ്പോഴാണ് കൃഷ്ണപിള്ള സ്മാരകം തകർക്കപ്പെട്ടത്. ഇത് ചെയ്തത് സിപിഎമ്മുകാരാണെന്നും ഇതിനു പിന്നിലെ വ്യക്തമായ അറിവ് സുധാകരനുണ്ടെന്നും സന്ദീപ് വാചസ്പതി ആരോപിച്ചു.
അമ്പലപ്പുഴയിൽ എച്ച്. സലാം സ്ഥാനാർഥിയായപ്പോൾ അദ്ദേഹം എസ്ഡിപിഐ ഏജന്റാണെന്ന് ആരോപിച്ച് പോസ്റ്ററുകൾ ഉയർത്തിയത് ബിജെപി അല്ല, മറിച്ച് സിപിഎമ്മിലെ ഒരു വിഭാഗം തന്നെയാണ്.
ഇക്കാര്യത്തിലും സുധാകരന് വ്യക്തമായ അറിവുണ്ട്. രാഷ്ട്രീയ ക്രിമിനലുകൾക്കെതിരേയുള്ള സുധാകരന്റെ കലഹം ആത്മാർഥമാണെങ്കിൽ ഈ കാര്യങ്ങളിലെല്ലാം അദ്ദേഹം മൗനം വെടിയണമെന്ന് ബിജെപി നേതാവ് ആവശ്യപ്പെട്ടു.
